Аксубай урманнарын җыештыру көтә

Ул 22 апрельдә башланды һәм 22 июньдә тәмамланачак.

– Акциянең язгы этабы кысаларында урман фонды территориясе каты көнкүреш калдыкларыннан, коры-сары һәм ауган агачлардан чистартылачак, – дип шәрехләде Аксубай урманчылыгы җитәкчесе Андрей Ильмухин. – Урман хезмәткәрләре шулай ук урманда аншлагларны, мәгълүмат такталарын һәм ял итү урыннарын төзекләндереләчәк.

Ел саен табигатьне саклау акциясендә катнашып, Аксубай урманчылары урманнарда тәртип урнаштыру буенча зур күләмле эшләр башкаралар. Алардан соң табигать чистарып, яктырып һәм матураеп кала. Районның кайбер оешмалары – волонтерлар белән хезмәттәшлек тәҗрибәсе дә уңыш китерә. Урманнарны чүп-чардан бергәләп арындыру һәм экологияне яхшыртуга үз өлешләрен кертер өчен, урманчылар игелекле дусларын, табигатьне яратучыларны, битараф булмаган район халкын язгы акциядә дә катнашырга чакыралар. Шунысын билгеләп үтү мөһим, мондый чараны уздыру «Экология» милли проектын гамәлгә ашыруга ярдәм итә.