Район мәдәният йортында Өлкәннәр көненә багышланган җылы һәм күңелле бәйрәм узды.
Яңартылган концерт залына районны төзегән, авыл хуҗалыгында, нефть табуда һәм башка предприятиеләрдә эшләгән хезмәт ветераннары җыелды.
Тантана башланыр алдыннан кунаклар өчен мобиль вакцинация пункты эшләде, анда пенсионерлар сезонлы гриппка каршы прививка ясый алды.
Район башлыгы Алмаз Мингулов якташларына сәламләү сүзе белән мөрәҗәгать итте:
– Хөрмәтле тармак ветераннары! Фидакарь хезмәтегез, зирәклегегез өчен чын күңелдән рәхмәт сүзләрен кабул итегез, – диде ул. – Аксубай районы уникаль, биредә гасырлар буе руслар, татарлар, чувашлар һәм башка халыклар дуслыкта яши. Нәкъ менә сез, хөрмәтле ветераннар, милләтара татулык традицияләрен саклап калдыгыз һәм аларны безгә мирас итеп тапшырдыгыз.
Район җитәкчесе билгеләп үткәнчә, махсус хәрби операция вакытында өлкән буын кешеләренең тәҗрибәсе һәм ярдәме аеруча кискен сизелә. Алар безгә СВО катнашучылары өчен гуманитар кәрваннар формалаштырырга ярдәм итәләр.
– Бүген 250дән артык якташыбыз Ватан сагында, – дип ассызыклады ул. – Патриотик позициягез, сугышчыларыбыз турында кайгыртуыгыз, догаларыгыз һәм җылы сүзләрегез өчен рәхмәт сезгә. Сезгә нык сәламәтлек һәм җан тынычлыгы телим.
Волонтерларга рәхмәт сүзләре
Район башлыгы бүген фронтка ярдәм итүчеләргә аерым рәхмәт сүзләрен җиткерде. Актив волонтерлык эшчәнлеге һәм гуманитар ярдәм җыюны оештыруга керткән шәхси өлешләре өчен Алмаз Мингулов Наталья Глазковага, Светлана Ксенофонтовага, Сәрия Зариповага, Ирина Васиковага, Надежда Сулбаевага, Рабига Хәлиловага, Рәмзия Сөнгатуллинага, Галина Никитинага, Людмила Нестеркинага, Нина Николаевага, Ольга Ишмаева, Валентина Дмитриева, Антонида Артемьева һәм Галина Киселева Рәхмәт хатлары тапшырды.
– Волонтерлар җыйган һәм үз куллары белән әзерләгән бар нәрсә – кием-салым, яшеренү челтәрләре, азык-төлек – егетләребез өчен зур ярдәм, – диде Алмаз Мингулов.
Тамашачылар аягүрә басып волонтерларга кул чаптылар.
Күңелгә хуш килгән бәйрәм рухын район мәдәният йорты коллективы әзерләгән концерт тулыландырды. Артистлар үзләренең иң яхшы номерларын башкардылар, җырлары, биюләре белән тамашачыларга онытылмаслык хисләр бүләк иттеләр, ә программа тәмамлангач, барлык кунакларны әзерләнгән өстәлләр артында бәйрәм чәе көтте.
Нет комментариев