Дәүләт автоинспекциясе көзен җәяүлеләр катнашында юл һәлакәтләре куркынычы артуын кисәтә

Татарстанда һәм Аксубай районында аварияләрнең торышы, ЮТҺ сәбәпләре һәм профилактика чаралары турында Аксубай районы Дәүләт автоинспекциясе җитәкчесе Нияз Гыймалетдинов сөйләде.

Агымдагы елның сигез аенда Татарстанда 1973 юл һәлакәте теркәлгән, аларда 212 кешенең гомере өзелгән һәм 2388 кеше тән җәрәхәтләре алган.

Узган елның шул ук чоры белән чагыштырганда, аварияләр саны 83кә, ә зыян күрүчеләр саны 131гә кимегән.

Шул ук вакытта һәлак булучылар саны 13 кешегә арткан.

Аксубай районында бу чорда 14 ЮТҺ булган.

Нәтиҗәдә ике кеше һәлак булган, 13 кеше тән җәрәхәтләре алган.

Дәүләт автоинспекциясендә билгеләп үтүләренчә:

Җәяүлеләр катнашындагы аварияләр аеруча борчу тудыра. Сигез ай эчендә республикада мондый 472 юл-транспорт вакыйгасы теркәлгән, аларда 36 кеше һәлак булган һәм 452 кеше тән җәрәхәтләре алган. Узган елның шул ук чоры белән чагыштырганда, ЮТҺ саны 14кә, яраланучылар саны 34кә кимегән. Шул ук вакытта һәлак булучылар саны 5кә арткан. Мондый хәл һәлакәтләрнең авыр нәтиҗәләре югары булып калуын күрсәтә — бу аеруча игътибар бирергә кирәк булган күрсәткеч.

Аксубай районында бу чорда җәяүле катнашында бер юл-транспорт фаҗигасы теркәлгән, анда кеше һәлак булган.

Мисал итеп, Нияз Гыймалетдинов Татарстандагы соңгы вакыйгаларны китерде.

Яшел Үзән районында 30 июльдә «Фольксваген» йөртүчесе җайга салынмаган җәяүлеләр кичүеннән юлны чыгып баручы ике җәяүлене бәрдергән. Икесе дә тән җәрәхәтләре алган.

22 сентябрьдә Тукай районында 51 яшьлек «Ауди» йөртүчесе 63 яшьлек хатын-кызны бәрдергән, ул, башлангыч мәгълүматлар буенча, юл хәрәкәте кагыйдәләрен бозып, юлның йөрү өлешенә чыккан. Җәяүле урында ук вафат булган.

— Статистикадагы һәр сан артында кеше гомере, якыннарының язмышы тора. Юл хәрәкәте кагыйдәләрен, гади куркынычсызлык чараларын үтәсәң, игътибарлы һәм уяу булсаң, күп фаҗигаләрне булдырмый калырга мөмкин, — дип ассызыклады Нияз Гыймалетдинов.

Ни өчен көзен яктылык кайтаргыч элементлар мөһим?

Дәүләт автоинспекциясе җитәкчесе яктылык кайтаргыч элементларны куллануга аерым игътибар бирергә чакыра. Көзге-кышкы чорда, караңгы иртә төшкәндә, җәяүлеләр машина йөртүчеләр өчен күренмәслек диярлек дәрәҗәдә була.

Яктылык кайтаргыч элементлар кешене фараларның якындагы яктылыгында 130-200 метр ераклыкта күрергә мөмкинлек бирә, ә җәяүлене алардан башка 25-50 метрдан гына күреп була. Бу машина йөртүчегә реакция ясау һәм бәрдерүне булдырмый калу өчен өстәмә секундлар бирә.

Юл хәрәкәте кагыйдәләре нигезендә, тәүлекнең караңгы вакытында һәм күз күреме җитәрлек булмаганда җәяүлеләргә юл кырыенда яки юл читеннән хәрәкәт иткәндә яктылыкны кире кайтара торган элементлардан файдаланырга киңәш ителә. Торак пунктлардан читтә аларның булуы мәҗбүри.

Нияз Гыймалетдинов яктылык кайтаргычларны киемнең күкрәк, бил яки янбаш турысына, шулай ук рюкзакларга һәм җиңнәргә беркетергә киңәш итә. Җәяүлене һәр яктан күреп булсын өчен, берничә элемент куллану яхшырак. Балаларның иминлегенә аерым игътибар бирергә кирәк.
 

— Юлларда иминлек һәрберебездән тора. Машина йөртүчеләргә җәяүлеләр кичүе янында бик игътибарлы булырга, тизлекне киметергә һәм һава торышын исәпкә алырга кирәк. Җәяүлеләр юлны бары тик билгеләнгән урыннарда гына чыгарга, юлга кинәт чыкмаска һәм һичшиксез яктылык кайтаргычлар кулланырга тиеш. Үзегезне һәм якыннарыгызны саклагыз, — дип мөрәҗәгать итте район халкына Дәүләт автоинспекциясе вәкиле.