Бу көн чын бәйрәмгә әверелде, ул җылылык, мәхәббәт һәм ихлас котлауларга күмелде, чөнки гаиләнең иң өлкән әгъзасы үзенең күпсанлы балаларын, оныкларын, туганнарын бер түбә астына җыйды. Тантана сәбәпчесен иң якын кешеләре әйләндереп алды, чын гаилә бәйрәме атмосферасы туды.
Рәсми котлаулар
Бу көнне Зоя Егоровнаны рәсми кунаклар да котларга килде. Район Башкарма комитеты җитәкчесе урынбасары Алексей Тимирясов һәм Иске Үзи авыл җирлеге вәкиле Татьяна Павлова юбилярга тирән хөрмәтләрен һәм рәхмәтләрен белдерделәр.
– Хөрмәтле Зоя Егоровна, сезне 90 яшегез белән чын күңелдән котлыйбыз! – дип мөрәҗәгать итте ветеранга район Башкарма комитеты җитәкчесе урынбасары Алексей Тимирясов. – Сезгә күп елларга сәламәтлек һәм бәхет телим. Сез алны-ялны белми фидакарь хезмәт куйгансыз, авыр заманнарда балалар үстергәнсез һәм аларны лаеклы кешеләр итеп тәрбияләгәнсез. Ихлас рәхмәт сүзләрен кабул итегез.
Алексей Тимирясов район башлыгының Рәхмәт хатын укыды, чәчәк бәйләме һәм истәлекле бүләк тапшырды. Иске Үзи авыл җирлеге вәкиле, җирле совет депутаты Надежда Павлова да ветеран адресына җылы сүзләр әйтте.
– Юбилеегыз белән, хөрмәтле Зоя Егоровна! Сезгә ныклы сәламәтлек, бәрәкәтле тормыш һәм мәхәббәтле гаилә кочагында озын-озак яшәвегезне телим! – дип котлады ул ветеранны.
Балачак һәм хезмәт
Зоя Наумова Киса авылында күп балалы гаиләдә туган. Бөек Ватан сугышы башлангач, әтисе фронтка киткән. Гаиләдә икенче бала буларак, Зоя кече туганнарын карашырга ярдәм иткән, әнисенә хуҗалыкта булышкан. Туган авылындагы җидееллык мәктәпне тәмамлаган. Бәхеткә, әтисе сугыштан исән-имин әйләнеп кайтып, озын гомер кичергән.
Унсигез яшеннән өлкәннәр белән бергә торф чыгару урыннарына йөри башлаган. Озын хезмәт юлында Зоя Наумова бик күп һөнәрләр үзләштергән: кырда, колхозда эшләгән, хәтта почтальон булып та эшләгән. Чигәргә һәм бәйләргә яраткан – ул кияүгә чыкканда үзенә кирәкле әйберләрне менә шулай әзерләгән.
Язмышын Яңа Мокшино егете Иван Наумов белән бәйләгән. Зояны ул Киса авылына туганнары янына килгәндә күреп алган. Ул вакыттагы гадәт буенча, Иван кызны үз йортына алып кайткан. 1958 елның гыйнварында алар туй үткәреп, татулыкка һәм үзара хөрмәткә корылган озын һәм бәхетле гаилә тормышына нигез салганнар.
Алар алты балага гомер бүләк иткәннәр, дүрт кыз һәм ике ул тәрбияләп үстергәннәр. Зоя Егоровна колхозда төрле эшләр башкарган: ашлык суктыруда катнашкан, борчак чапкан, колхоз өчен өйдә ипи пешергән.
Зоя Егоровнаның тормыш иптәше 2009 елда вафат булган. Ләкин ул ялгыз түгел – аның балалары һәм оныклары кадерле әниләрен һәм әбиләрен чиксез мәхәббәт һәм кайгыртучанлык белән уратып алганнар.
Зоя Егоровнаның балалары төрле шәһәрләргә таралышканнар, ләкин аларның икесе – кызлары Люба һәм улы Василий – туган авылларында калып, әниләре янәшәсендә яшиләр, көн саен аңа мәхәббәтләрен һәм кайгыртучанлыкларын бүләк итәләр. Ветеранның зур гаиләсе: тугыз оныгы һәм җиде оныкчыгы бар. Олы кызы Галина балачагын җылылык белән искә алды.
− Без мәхәббәт һәм кайгыртучанлыкта үстек. Әнибез таләпчән, ләкин гадел иде. Әти белән алар безне укыттылар, аякка бастырдылар. Без моның өчен аларга чиксез рәхмәтле.
Нет комментариев