Ә ферма яши

Яңа Мокшинода ферма биналарының беркайчан да буш тормавы биредә яшәүче халыкның хезмәт сөючәнлеге турында сөйли.

«Сөлчә» колхозы составында булганда биредә савым сыерлары асралган булса, бүген исә «ВАМИН-Аксу» ООО ның «Яңа Аксубай» бүлеге буларак, үгезләр үстерелә. Өстәвенә фермада элек-электән җирле халык эшләгән һәм бүген дә эшли. Монда коллектив зур булмаса да-эш җайга салынган, терлекләрдән югары артым алына.
Үгезләрне тәрбияләүдә дүрт терлекче-Владимир Ликеев, Николай Яругин, Владислав Наумов (рәсемдә) зур тырышлык күрсәтәләр. Ферма мөдире Любовь Васильева аларны үз эшләрен җиренә җиткереп башкарган, җаваплы хезмәткәрләр дип телгә ала. Кыш көне терлекләр рационы тулы кыйммәтле булсын өчен җәен азыкны үзләре хәзерлиләр һәм шуның бәрабәренә артым да югары, ә хезмәт хакы турыдан-туры аларның терлекләрдән нинди үсеш алуына бәйле.