Район Башкарма комитеты җитәкчесе Алмаз Мингулов белән бергә Татарстан Президенты ярдәмчесе һәм “Беренчеләр хәрәкәте” Бөтенроссия яшьләр оешмасының төбәк бүлеге җитәкчесе Тимур Сөләйманов 1нче Аксубай урта мәктәбендә булды.
Кече сыйныф укучылары кунакларны күңелле һәм хәрәкәтчән флешмоб белән җылы каршы алдылар. Тимур Сөләйманов уку бинасының яңаруын лаеклы бәяләде – балаларга белем алу һәм үсеш өчен яхшы шартлар тудырылган. Мәктәп тормышы һәм тәрбия юнәлешләре белән танышу укучылар ял итә торган бинада дәвам итте.
Төбәк “Беренчеләр хәрәкәте” җитәкчесенә мәктәп укучыларының шахмат һәм шашка, шулай ук декоратив-гамәли иҗат белән шөгыльләнүләрен күрсәттеләр. Яшь юл хәрәкәте инспекторлары отряды үз эше турында бәян итте, ә “Ориент” эзләү отряды әгъзалары Мясной Бордагы экспедицияләр вакытында табылган Бөек Ватан сугышы чоры әйберләрен күрсәттеләр. Кызлар футбол командасы мәктәпнең горурлыгы булып тора, аның казанышлары белән тренер-укытучы Валерий Павлов таныштырды. “Беренчеләр хәрәкәте” беренчел оешмасы әгъзалары үз эшчәнлекләре белән уртаклаштылар, үзешчән сәнгатьтә катнашучылар рус, татар һәм чуаш халыклары мәдәниятен тәкъдим иттеләр. Җитәкчеләрнең укучылар белән әңгәмәсе җылы һәм иркен атмосферада узды.
– Өч ел элек “Беренчеләр хәрәкәте” яшьләр оешмасы төзелде, ул үсүен һәм камилләшүен дәвам итә, – дип билгеләп үтте Тимур Сөләйманов. – Аның асылы – яшьләрне берләштерүче бердәм команда булдыру. “Беренчеләр хәрәкәте”нең бурычы – Россия, үз республикасы, районы белән бергә булырга, бу элемтәне тоярга; ялгызы гына түгел, бергәләп хәрәкәт итәргә; әхлакый кыйммәтләргә ярдәм итәргә, актив булырга һәм үсешкә омтылырга.
Балаларга мөрәҗәгать итеп, җитәкче төрле юнәлешләрне берләштерүче “Беренчеләр хәрәкәте”нең нәтиҗәлелеген ассызыклады. “Беренчеләр хәрәкәте” катнашучылары үзләрен төрле өлкәләрдә сынап карау, үз мәнфәгатьләрен билгеләү, остазлар һәм киңәшчеләр ярдәмендә үсү мөмкинлегенә ия. Вәкил спорт, патриотик, яшь юл хәрәкәте инспекторлары һәм волонтерлык эшчәнлеген үз эченә алган бердәм зур хәрәкәт булдыру өчен уртак эшнең мөһимлеген билгеләп үтте. “Беренчеләр хәрәкәте” берләшкән платформа булырга тиеш, ул балаларга һәрьяклап үсәргә һәм үз районнарын данларга ярдәм итәчәк.
Нет комментариев