Район Советында ТР Урман хуҗалыгы министры урынбасары Рәис Гомәров катнашында Урман хуҗалыгы хезмәткәрләре киңәшмәсе булды.
Аксубай урманчылыгы эшчәнлеге турындагы хисап доклады белән баш урманчы Андрей Ильмухин чыгыш ясады.
– «Урманнарны саклау» федераль проекты («Экология» илкүләм проекты) кысаларында 58,43 гектар мәйданда эшләр башкарылды, – дип билгеләп үтте ул. – Урманнарны ясалма торгызу эшләре – 23 гектарда, табигый торгызу эшләре 35,46 гектарда башкарылды. Питомникларда орлыклар 0,52 га мәйданда чәчелде, план буенча 0,40 га (130%). Питомникларда европа чыршысы, гади нарат, сабакчалы имән, асылынып торган каен һәм башка агач һәм куак төрләре үстерелә. 80 кг орлык әзерләнде: каен – 65 килограмм, нарат – 15 килограмм. Имән чикләвеген җыю дәвам итә. Урман культураларын урман белән капланган мәйданга күчерү 26,5 гектар тәшкил итте. Шул ук вакытта, куш тояклы хайваннар тарафыннан урман культураларына һәм яшь үсентеләргә зыян китерелә, бу исә утыртмаларның һәлак булуына китерә. 166,7 гектар мәйданда механикалаштырылган һәм кул белән агротәрбия үткәрелде, 52,4 гектарда өстәмә урман культуралары утыртылды. «Хәтер бакчасы» акциясендә учреждение хезмәткәрләре һәм авыл җирлекләре катнашты, 7955 үсенте утыртылды.
Чыгыш ясаучы урманны саклау һәм санитария чараларына, урманны янгыннан саклау мәсьәләләренә тукталды: профилактик чаралар аркасында урман янгыннары очраклары теркәлмәгән. Киңәшмәдә мәктәп урманчылыклары эшчәнлегенә анализ ясалды: районда алар дүртәү исәпләнә. Яшь урманчылар «Урман утырту көне», «Хәтер бакчасы», «Татарстанның чиста урманнары», «Иң яхшы җимлек», «ЭКОяз» акцияләрендә һәм «Үсенте», «Сыерчык оясы яса» конкурсларында катнашалар. Быел «Урман патруле» командасы Лубянда узган Татарстан мәктәп урманчылыкларының IX Слетында команда зачетында 2 урынны алды.
Рәис Гомәров урманчылыкның эшчәнлеген уңай бәяләде. Узган ел белән чагыштырганда урман хуҗалыгы министрлыгы да яхшырак булды – Россиядә ул алдынгылар арасында.
– Быел безнең төп бурыч – янгын куркынычы булган чорны янгыннарсыз үткәрү, – дип билгеләп үтте министрлык вәкиле. – Әлегә моңа һава торышы да ярдәм итә, профилактик эшләр дә нәтиҗәләр бирде. Язын коры үлән бик күп булачак, көздән профилактик эшләр башкарырга кирәк.
Киңәшмәгә район Башкарма комитеты җитәкчесе Станислав Зайцев йомгак ясады. Ул урманчылык коллективының лаеклы эшләвен билгеләп үтте.
Нет комментариев