ТР Төзелеш, архитектура һәм торак-коммуналь хуҗалык министрлыгының Дәүләт инвестицияләр төзелеше идарәсе директоры урынбасары Виктор Никитенко, район башлыгы Алмаз Мингулов, Татарстан Республикасы Рәисе Аппаратының территорияләр белән эшләү идарәсе баш киңәшчесе Салават Рәхимов, шулай ук төзелеш һәм төзекләндерү эшләре барган объектларның подрядчы оешмалары вәкилләре белән берлектә эш сәфәре уздырдылар.
Тикшерү барышында комиссия эшләрнең барышы белән җентекләп танышты, подрядчыларның тәкъдимнәрен тыңлады, төзелеш һәм ремонт темпларына йогынты ясарга мөмкин булган проблемалы мәсьәләләрне тикшерде. Катнашучылар башкарыла торган эшләрнең сыйфатына һәм графикларның үтәлешенә аерым игътибар бирделәр.
Мөһим проектларның берсе – ясалма бозлы ябык шугалак. Бу – хоккей һәм фигуралы шууны яратучылар, балалар һәм яшьләр спорт секцияләре өчен күптән көтелгән объект. Заманча шугалакның барлыкка килүе ел әйләнәсе спорт белән шөгыльләнү, массакүләм чаралар, ярышлар үткәрү һәм балаларның сәламәтлеген ныгыту өчен яңа мөмкинлекләр ачачак. Подрядчылардан боз аренасының заманча, куркынычсыз һәм килүчеләр өчен уңайлы булуы өчен вакытны һәм технологик таләпләрне төгәл үтәү таләп ителде.
Тикшерүнең үзәгендә шулай ук шәһәр тибындагы бистәнең үзәк өлешен үстерү – ике паркны төзекләндерү мәсьәләсе торды. Биредә иҗтимагый киңлекләрне яңарту, җәяүлеләр зоналарын булдыру, яшелләндерү, кече архитектура формаларын урнаштыру каралган. Максат – йөрү, балалы гаиләләрнең ял итүе, мәдәни һәм социаль әһәмиятле чаралар үткәрү өчен уңайлы, эстетик яктан җәлеп итүчән мохит тудыру.
– Аксубай үзәге район халкы һәм кунаклар өчен чын мәгънәсендә җәлеп итү үзәгенә әйләнергә тиеш, – дип ассызыкладылар тикшерүдә катнашучылар.
Аерым тема булып Яшьләр үзәгенә капиталь ремонт ясау торды. Биредә матди база гына ныгытылмый, янәшәдәге территорияне төзекләндерү эшләре дә башкарыла, шулай ук яшьләр берләшмәләренең нәтиҗәлерәк эшләве, балаларны иҗтимагый файдалы эшчәнлеккә җәлеп итү, туган районга карата җаваплы мөнәсәбәт формалаштыру өчен шартлар тудырыла.
Комиссия тагын бер мөһим объектны – район Мәдәният йортын карады. Балалар сәнгать мәктәбе бинасына капиталь ремонт эшләре дәвам итә. Яңартылган сәнгать мәктәбе яшь музыкантларга, рәссамнарга һәм башка иҗади балаларга уңайлырак шартларда шөгыльләнергә мөмкинлек бирәчәк. Тикшерелгән объектлар арасында «Дельфин» йөзү бассейны бинасы да бар. Биредә җиһазлар сатып алу белән бергә капиталь ремонт эшләре алып барыла.
«Нефтьчеләр паркы» карап чыгу программасының аерым пункты булды. Эш сәфәренә йомгак ясап, Төзелеш, архитектура һәм торак-коммуналь хуҗалык баш идарәсе, район җитәкчелеге һәм тармак хезмәтләре вәкилләре билгеләп үткәнчә, барлык объектлар да районны алга таба үстерү өчен зур әһәмияткә ия. Һәм халык аларны көтә. Төп шарт – эшләрне сыйфатын төшермичә, билгеләнгән вакытта төгәлләү.
Нет комментариев