Виталий Тимирясов исемендәге 1нче Аксубай мәктәбендә җәйнең төп педагогик вакыйгасы – мәгариф хезмәткәрләренең август киңәшмәсе пленар утырышы булып узды.
Киңәшмә эшендә район башлыгы Алмаз Мингулов, Россия Федерациясе Федераль Җыены Дәүләт Думасының Контроль комитеты рәисе Олег Морозов, ТР Дәүләт Советы депутаты, «Татарстан Республикасының һөнәри компетенцияләрне үстерү үзәге» АНО генераль директоры Эмиль Гобәйдуллин, Татарстан Республикасы Рәисе Аппаратының территорияләр белән эшләү идарәсе баш киңәшчесе, район кураторы Салават Рәхимов катнашты.
Чара башланыр алдыннан күргәзмә мәйданчыгы эшләде, анда районның мәгариф учреждениеләре узган уку елындагы казанышларын тәкъдим иттеләр. Педагоглар, мәктәп укучылары һәм балалар бакчалары тәрбияләнүчеләре үзләренең иң яхшы проектларын күрсәтеп, мәктәп фойесын чын мәгариф форумына әйләндерделәр.
Районның мәгариф системасы турындагы хисап доклады белән мәгариф бүлеге җитәкчесе Рәмзия Зәйдуллина чыгыш ясады. Ул республика җитәкчелегенә, ТР Мәгариф һәм фән министрлыгына, район җитәкчелегенә мәктәпләрне ремонтлау һәм матди-техник базаны яңарту мөмкинлеге өчен рәхмәт белдерде.
–Аксубай мәктәпләрендә 375 укытучы, балалар бакчаларында 108 тәрбияче эшли. Әмма кадрлар проблемасы кискен тора: педагоглар пенсиягә чыгу сәбәпле вакансияләр ачыла. Быел бердәнбер яңа белгеч хезмәттәшләренә йөкләнеш арту нәтиҗәсендә генә килде. «Бу проблеманы максатчан укыту ярдәмендә хәл итәргә ниятлибез, 2027 елда яшь белгечләрне (башлангыч сыйныфлар һәм чит телләр укытучылары) көтәбез, – дип билгеләп үтте Рәмзия Зәйдуллина.
Ул педагогларның һәм мәктәпләрнең төп казанышларына да тукталды.
– «Россиянең ел укытучысы» Бөтенроссия конкурсының республика этабы нәтиҗәләре буенча, 2025-2026 уку елында Иске Ибрай урта мәктәбенең математика һәм физика укытучысы Айрат Шәрифуллин «Педагогик дебют» номинациясендә лауреат булды; Аксубай 3нче урта мәктәбенең татар теле һәм әдәбияты укытучысы Зилә Билалова «Йөрәгемне балаларга бирәм» номинациясендә җиңүче дип танылды.
«Ләйсән» балалар бакчасы «Иң яхшы билингваль балалар бакчасы -2025» гранты җиңүчесе булды. 2026 елда «Безнең яңа тәрбиячебез» акчалата бүләкләүгә конкурс сайлап алуында Әдилә Мәсгутова («Буратино) җиңү яулады, «Безнең яңа укытучыбыз» номинациясендә Айрат Шәрифуллин һәм Аксубайның 3нче мәктәбе педагогы Виктория Уткина җиңүчеләр булдылар. 2026 елда «Педагог – ясалма фәһем түгәрәге җитәкчесе» гранты буенча ТР бюджетыннан түләү алу буенча республика конкурсында Аэлита Шуркина (Аксубайның 2 нче мәктәбе), Галина Ишметова (Савгач урта мәктәбе), Айрат Шәрифуллин җиңүчеләр булдылар.
Районда физика-математика һәм физика-химия юнәлешендәге белем бирүне үстерү буенча системалы эш алып барыла: бу укучыларны һәм укытучыларны дәртләндерүдән башлап, мәгариф учреждениеләрен кирәкле җиһазлар белән тәэмин итүгә кадәр үз эченә ала.
Аксубай 3нче мәктәбенең проект төркеме «Белем векторы» уку проектын гамәлгә ашыру һәм 2025 елда бер миллион сум күләмендә «Мәктәптә физмат алгарышы» грантын үзләштерү өстендә эшләде. Виталий Тимирясов исемендәге Аксубайның 1нче мәктәбе «Зачет траекториясе: төгәллек, мантыйк, нәтиҗә» уку проектын гамәлгә ашыруга юнәлдереләчәк шундый ук бер миллион сумлык грантка ия булды. Хәзер физика һәм химия буенча лаборатор җиһазлар сатып алуга «Мәктәптә физхим алгарышы» грантына ике миллион сум күләмендә заявка бирү буенча әзерлек бара. Иске Ильдеряк мәктәбе 2026 елда физика һәм химия алгарышы кысаларында 5-8 сыйныф укучылары өчен физика буенча факультатив курслар кертү мәйданчыгы итеп сайланды. Мәйданчык Республика олимпиада үзәге аша түгәрәк алып бару өчен лаборатория җиһазлары белән җиһазландырылачак. Укучыларның алга киткән проектларда уңышлы катнашуы район өчен зур казаныш булды.
2026 елда гомуми белем бирү оешмаларының 5-11 сыйныф укучыларына акчалата бүләкләүгә конкурс йомгаклары буенча “Физика-математика алгарышы” проектын гамәлгә ашыру кысаларында Әлфис Канәфин (Аксубайның 2нче мәктәбе), Артур Гайнетдинов һәм Юлия Стешина (Аксубайның 3нче мәктәбе), Хәлим Кадыйров (Иске Ибрай урта мәктәбе) җиңүчеләр булдылар. 2025 елда 2 җиңүче булган.
Укучыларның уңышлары турында сөйләгәндә, мәгариф бүлеге җитәкчесе билгеләп үткәнчә, Бөтенроссия һәм республика олимпиадалары йомгаклары буенча 42 призлы урын алынган, бу узган ел белән чагыштырганда 4 кә күбрәк. Җиңүчеләр һәм призерлар арасында: Бөтенроссия укучылар олимпиадасының төбәк этабында 10 призлы урын; Республика укучылар олимпиадасының йомгаклау этабында 25 призлы урын; «Олимпка юл» республика укучылар олимпиадасының йомгаклау этабында 7 призлы урын. Моннан тыш, Татарстан Республикасында «Софиум» сайлау хокукы һәм сайлау процессы мәсьәләләре буенча Бөтенроссия укучылар олимпиадасының төбәк этабында 1 призлы урын.
Рәмзия Зәйдуллина мәктәп укучыларының республика олимпиадаларындагы казанышлары, БДИдагы уңышлары турында сөйләде. БДИның 8 фән буенча уртача баллы республика күрсәткечләреннән югарырак булуын билгеләп үтте.
Чыгыш ясаучы мәктәпкәчә учреждениеләр эшчәнлегенә, укучыларны патриотик тәрбияләүгә (узган уку елында гражданлык-патриотик юнәлештәге 500дән артык чара үткәрелгән) тукталды. Ул «Яшь армия» хәрәкәтенә, «Беренчеләр хәрәкәтенә» тукталды.
БЕЗНЕҢ БЕЛЕШМӘ.
Районда 14 урта, 7 төп һәм 5 башлангыч мәктәп һәм 2 филиал эшли: 2172 бала укый. Мәктәпләр каршында 10 балалар бакчасы һәм 17 төркем эшли, аларда 610 бала тәрбияләнә. Яңа уку елында 175 беренче сыйныф укучысы мәктәп бусагасыннан атлап керәчәк. Яңа уку елына әзерлек һәм «Мәктәпкә җыенырга ярдәм ит» хәйрия акциясе кысаларында барлык беренче сыйныф укучыларына һәм махсус хәрби операциядә катнашучыларның гаиләләрендә тәрбияләнүче балаларга портфельләр һәм канцелярия кирәк-яраклары җыелмалары тапшырылган.
Киңәшмәдә катнашучыларны үзләренең авторлык эшләнмәләре белән «Кояшкай» балалар бакчасы тәрбиячесе Татьяна Минханова, Иске Ибрай урта мәктәбе укытучысы Айрат Шәрифуллин таныштырды.
Район педагоглары алдында сәламләү сүзе белән РФ Дәүләт Думасы депутаты Олег Морозов чыгыш ясады. Ул педагогик коллективның эшен иң яхшы позициядән бәяләде.
– Бу конференциядә катнашканда мәгарифтә барган хәлләрдән мин бик уңай хисләр кичерәм, – дип белдерде федераль парламентарий вәкиле. – Мәктәпкә тәрбия функциясе, әхлакый ориентир кайта, мәдәнияттә, сәнгатьтә заман бәйләнеше бөтенләй диярлек югалмаган. Һәм бу бик дөрес, бу – кешене тәрбияләүнең нигезе.
Район башлыгы Алмаз Мингулов мәгариф учреждениеләре коллективларына уңышлары өчен рәхмәт белдерде.
–Бурыч – киләсе елга югары дәрәҗәдәге эшне югалтмаска, – дип ассызыклады ул.
Хезмәттәшләренең бердәм алкышлары астында югары нәтиҗәләргә ирешкән педагогларны тармак бүләкләре, район башлыгының Рәхмәт хатлары белән бүләкләү тантанасы булды.
Киңәшмәдә катнашучылар бертавыштан 2026/2027 уку елына район мәгарифен үстерү юнәлешен билгеләгән резолюцияне кабул иттеләр.
Нет комментариев