Анатолий Горбунов – исеме район үсеше белән тыгыз бәйләнгән кеше.
Аның хезмәт юлы 1979 елда электромонтер һөнәреннән башлана, ә армиядә хезмәт иткәннән соң ул тормышын туган җире белән бәйләргә карар кыла. Казан авыл хуҗалыгы институтын тәмамлап, икътисадчы белгечлеге алгач, Анатолий Федорович колхоз кырларыннан, казначылыктан алып район Башкарма комитеты җитәкчесенә кадәр чын тормыш мәктәбен үтә. Җаваплы постларда аның гомуми эш стажы – 35 ел.
Аның җитәкчелегендә район үзгәрде. Анатолий Федорович вакытында авылларда сигез яңа күпфункцияле үзәк барлыкка килде, анда кешеләр теләсә нинди документны йорт янәшәсендә рәсмиләштерә ала. Яшь гаиләләр өчен дүрт күпфатирлы йорт һәм район үзәгендә 260 урынлык заманча балалар бакчасы төзелде. Түбән Татар Майнасында – уңайлы мәктәп-балалар бакчасы, ә Иске Ильдеряктә нәниләр өчен төркем ачылды. Районның спорт тормышын хәзер «Дельфин» бассейныннан, чаңгы базасыннан һәм егерме бер универсаль спорт мәйданчыгыннан башка күз алдына да китереп булмый. Аның вакытында ук Аксубай үзәге яңартылды, ветеринария пунктлары, участок вәкилләре өчен торак һәм бөтен район буенча фельдшер-акушерлык пунктлары төзелде.
–Анатолий Федорович беркайчан да җаваплылыкны үз өстенә алудан курыкмады, – дип искә ала хезмәттәшләре. – Башкалар баш тартканда, ул чишелеш эзли иде.
Намуслы хезмәте һәм үз эшенә тугрылыгы өчен Анатолий Федорович «Фидакарь хезмәт өчен» медале һәм «Финанс эше отличнигы» билгесе белән бүләкләнгән. Аксубай районының Мактаулы гражданины исемен бирү район Советы тарафыннан аның казанышларын тануның иң югары билгесе булды.
Нет комментариев