Аксубай районы башлыгы Җиңү солдатын Ватан сакчысы көне белән котлады

Камил Гилманов фашистлар германиясе белән сугышның бүгенге көндә исән булган бердәнбер катнашучысына иң җылы рәхмәт сүзләрен җиткерде.

– Сезгә, Елисей Мурзич, районның барлык халкыннан һәм шәхсән үз исемемнән фашизмны җиңгән өчен, Бөек Ватан сугышында күрсәткән батырлыкларыгыз өчен чиксез рәхмәт, – диде ул. – Без Сезнең белән горурланабыз, кадерле ветеран!

Елисей Мурзич, һәрвакыттагыча, район җитәкчесен парад костюмында каршы алды, сәламәтлеге элеккеге еллардагы кебек булмаса да, фронтовик котлауларга чын күңелдән шатланды.

Камил Гилманов ветеран белән җылы әңгәмә корды.

– Без Сезне 9 майда узачак Җиңү Парадында күрүебезгә бик шат булачакбыз, – диде ул, ветеранга ныклы сәламәтлек һәм иминлек теләп.