Хайваннарның сәламәтлеге турында кайгырту – гуманлы хезмәт

Ветеринария белгечләре район территориясендә терлекләрнең сәламәтлеген һәм иминлеген тәэмин итү буенча мөһим миссия башкаралар. Аларның эшчәнлеге бурычларның киң спектрын үз эченә ала: авыруларны профилактикалаудан һәм диагностикалаудан алып хайваннарны дәвалауга һәм тернәкләндерүгә кадәр.

–Ветеринария берләшмәсе хезмәткәрләренең бурычы – хайваннар һәм кешеләр арасында куркыныч авырулар таралуга юл куймау. Һәм бу бурыч уңышлы үтәлә, – дип билгеләп үтте район ветеринария берләшмәсе җитәкчесе Рәис Хөснуллин. – Безнең район себер түләмәсе, котыру авыруы, нодуляр дерматит кебек күп кенә аеруча куркыныч йогышлы зооавырулардан имин санала. Бу – ветеринария берләшмәсе хезмәткәрләренең тырыш хезмәте нәтиҗәсе.

Коллективта 27 белгеч эшли, шул исәптән 13 мал табибы һәм 9 ветеринария фельдшеры. Районда өч модульле участок ветеринария пункты эшли, алар җирлекләрдә яшәүчеләрнең шәхси хуҗалыкларындагы терлекләргә һәм авыл хуҗалыгы предприятиеләре малларына хезмәт күрсәтә. Бу халык теләп кабул итә торган югары квалификацияле һәм тәҗрибәле белгечләр. Район кешеләре белән үзара аңлашу һәм тыгыз элемтәдә тору авыруларны профилактикалауда зур әһәмияткә ия.

Берләшмәдә бруцеллез һәм лейкозга тикшеренүләр уздырыла торган ветеринария лабораториясе эшли. Лаборатория эше белән күптән түгел югары уку йортын тәмамлаган яшь белгеч җитәкчелек итә, бу ветеринар һөнәренең яшьләрне җәлеп итүен тагын бер кат раслый.

Шулай ук район ветеринария берләшмәсендә йорт хайваннарын кабул итү өчен клиника бар.

Ветеринарлар эшендә күп нәрсә аларның кирәкле материаллар, препаратлар һәм техника белән тәэмин ителүгә бәйле. Бу уңайдан район ветеринария берләшмәсендә барысы да уңай: федераль һәм республика бюджетлары ярдәмендә эшне уңышлы башкару өчен бөтен кирәкле әйберләр белән үз вакытында һәм тулы күләмдә тәэмин итү гамәлгә ашырыла. Быел коллектив яңа җиңел автомобиль алды.

Коллектив ветеринария хезмәтенә заманча таләпләр нигезендә эшли. 2025 елдан башлап Татарстанда этләрне теркәү һәм бал кортларын маркировкалау мәҗбүри процедураларга әйләнде. Берләшмә белгечләре ел башыннан алып меңгә якын этне теркәгәннәр һәм районда умарта күчләрен маркировкалауны төгәллиләр.

Ветеринария хезмәте шулай ук ВетИС Федераль дәүләт мәгълүмат системасы кысаларында да эшли.

Район ветеринария берләшмәсе командасында үз эшенең чын осталары хезмәт куя.

Һөнәри бәйрәм – җәмгыять файдасына хезмәт куючы кешеләргә рәхмәт әйтү өчен менә дигән мөмкинлек. Авыл хуҗалыгы һәм азык-төлек идарәсе министрлыгының Рәхмәт хатларына «МОЛКО» ҖЧҖ ветеринария табибы Алексей Яковлев, район ветеринария берләшмәсе ветфельдшерлары Людмила Федорова һәм Фиркат Шиһапов лаек булдылар. ТР Авыл хуҗалыгы министрлыгының Мактау грамотасы белән персонал буенча белгеч Руфия Билалова бүләкләнде.

ТР Министрлар Кабинетының Баш ветеринария идарәсе Мактау грамоталары табиб-серолог Елена Чурбановага, «МОЛКО» ҖЧҖнең товарлыклы-сөтчелек комплексы баш ветеринария табибы Михаил Константиновка һәм әлеге предприятие мал табибы Гөлия Әхмәтҗановага тапшырылды.

Район Башкарма комитетының Рәхмәт хатлары белән лаборант Ирина Крайнованың һәм ветфельдшерлар Люция Мясникова белән Марина Парфенованың хезмәтләре билгеләп үтелде.