«Уылдык чәчү» операциясе – табигатьне саклау өчен

Балык тотуны тыю 5 июньгә кадәр озайтыла. Бу вакытта Татарстан акваторияләрендә сәнәгать балыкчылыгына тулысынча тыю кертелә.

«Уылдык чәчү» операциясе кысаларында дәүләт комитеты һәм эчке эшләр министрлыгы хезмәткәрләре хайваннар һәм үсемлекләр дөньясы объектларын, су-биологик ресурсларны саклау өлкәсендә хокук бозуларга юл куймау буенча рейд чаралары үткәрә.

— «Уылдык чәчү» операциясе вакытында һәвәскәр балыкчыларга ярдан гына һәм бер калкавыч яисә кармак белән генә тотарга рөхсәт ителә, кармаклар саны – бер кешегә 2 данәдән дә артмаска тиеш, – дип аңлата хайваннар һәм үсемлекләр дөньясы объектларын, махсус саклана торган табигать территорияләрен саклау буенча районара бүлек җитәкчесе Николай Крайнов. – Тотуның барлык тыелган ысулларын (челтәр, багра) куллану тыела. Кагыйдәләрне бозу административ җаваплылыкка гына түгел, җинаять җаваплылыгына да китерергә мөмкин.

Күптән түгел Яңа Ильдеряк янындагы буада бер граждан тоткарланган. Аны тыелган балык тоту кораллары белән аучылык биләмәләрендә булган өчен административ җаваплылыкка тартканнар. «Табигать сөючеләргә» шуны истә тотарга кирәк: әлеге җирләрдә закон тыйган һәр төрле гамәл, хәтта кулланылмаса да, кагыйдә бозу булып санала һәм законның тиешле маддәсе буенча җаваплылыкка китерә.

Күптән түгел көтелмәгән гадәттән тыш хәл булды. «Уылдык чәчү» операциясе барышында Сөлчә елгасында ТР Биологик ресурслар буенча дәүләт комитеты хезмәткәрләре «Беркут» аучылык хуҗалыгының җитештерүче ау инспекторы белән бергә ике гражданны тоткарлаган. Алар көймәләрдән балык тоту өчен тыелган үткен очлы җайланмаларны кулланганнар. Уылдык чәчүгә әзерләнүче эре балыкларны әлеге кораллар белән чәнчеп тотканнар. Нәтиҗәдә, тоткарлау вакытында көймә, тыелган балык тоту җайланмалары һәм законсыз тотылган су биологик ресурслары йолып алынган. Кагыйдәләрне бозу факты буенча РФ Җинаять кодексының 256 нчы маддәсе («Су биологик ресурсларын законсыз аулау (тоту)») буенча җинаять эше кузгату мәсьәләсе хәл ителә.