Уканеевлар гаиләсе Аксубай районы данын шәҗәрә бәйгесе финалында яклаячак 

Яңа Чишмәдә «Гаилә тарихында гасырлар кайтавазы – Без тарихта эзлебез» республика гаилә шәҗәрәсе бәйгесенең зональ этабы узды. 

Анда сигез районнан вәкилләр катнашты. Безнең районнан Кече Сөнчәле авыл мәдәният йорты методисты Вера Уканеева гаиләсе катнашты. Ул үзенең кызы Вера Крайнова, оныкчыгы Софья, кыз туганнары Валентина Калукова һәм Татьяна Артамонова, бертуганының улы Илья Калуков белән Андреевлар нәселен тәкъдим итте. 

Район мәдәният йорты холлында Уканеевлар кунакларны күргәзмә белән таныштырдылар, анда буыннардан-буыннарга тапшырылучы Андреевлар нәселенең китаплары, сөлгеләр һәм киемнәр тәкъдим ителде. Чуаш телендә күңелле җырлар астында гаилә әгъзалары жюрины милли хуплу ризыгы белән сыйлады. Вера Уканеева 1759 елдан башлангыч алган әтисе линиясе буенча үзенең нәселе турында сөйләде. 

– Башта нәселебез Андрейдан башлана дип уйладык. Ул Сөнчәледә яшәгән, умартачы булган, – дип сөйләде ул. – Тик күптән түгел тамырларның тагын да тирәнрәк китүе ачыкланды. Без аның әтисе – Тихон турында мәгълүматлар таптык. Әлбәттә, моңа инану өчен, тагын да тикшеренүләр үткәрергә һәм күбрәк архив документлары табарга кирәк булды. 

Бәйгенең икенче сынавы – бу «Таныш булыгыз, минем гаиләм, минем нәсел!» визит карточкасы булды. Район мәдәният бүлеге сәхнәсендә Уканеевлар гаиләсе презентациянең алмашынып торган слайдлары нигезендә җырлады да, биеде дә, жюрины һәм тамашачыларны үзенең якты иҗади номерлары белән таң калдырды. 

– Безнең нәселнең борынгы халык җырларын бары гармунга кушылып кына башкару мөмкин. Элек-электән һәр авыл өендә бу уен коралы булган. Кода Эдуард Ильин безгә гармунда уйнады. Моның өчен аңа ихластан аерым рәхмәт, – диде Вера Уканеева. – Сәхнәдә үзебезнең ана телебез – чуаш телендә сөйләштек һәм җырладык, оныкларның ата-бабаларының җырларын белүләре яхшы. 

Уканеевлар гаиләсе иҗади номерны берничә көн эчендә әзерләгән, ә гаилә шәҗәрәсе буенча материаллар күп еллар дәвамында тупланган. 

– Үз нәселем турындагы фактларны мин балаларга да, оныкларга да өйрәнү кызыклы булырлык итеп тәкъдим иттем. Аларның да минем кебек мавыгуларын бик теләр идем. Безнең гаилә тарихы әкиятләрдә, легендаларда, җырларда яшеренгән. Әбиләрнең сөйләгәннәре бу мәгълүматларны документаль рәвештә ачыклауга этәрде. Архивларда ни дә булса табар өчен йокысыз төннәр китә. Туган якны өйрәнүчеләр белән тыгыз элемтә, дуслык бу эштә бик булыша, – дип ассызыклады Вера Викторовна. – Үз хезмәтеңнең нәтиҗәләрен күргәч, үз ата-бабаларыбыз, аларның тормышлары өчен йөрәк әрнеп куя. Әмма шатлык күбрәк. Чөнки үзеңнең дөрес юлда булуыңны аңлыйсың, тарих белән очрашасың. 

Андреевлар нәселе вәкилләре үз чыгышларында ата-бабаларының тормышларын, аларның көнкүрешен заманча аранжировкада, интерпретацияләрдә тапшырырга тырыштылар. 

–Репетицияләргә вакытыбыз бик булмады. Кешеләр әлеге бәйгегә еллар буе әзерләнә. Үз нәселеңне белергә, барлык туганнарың белән яхшы элемтәдә торырга кирәк бит. Моннан тыш, барысын да матур итеп тәкъдим итә белү мөһим. Сәхнәгә чыккач, шундый җиңел булып китте. Без интуитив рәвештә нәрсә сөйләргә, ничек хәрәкәт итәргә кирәклеген белдек, безгә ата-бабаларыбыз ярдәм иттеләр күк, – ди Вера Уканеева. 

Зональ этапта район вәкилләре мактаулы өченче урынны яуладылар. Бәйге кагыйдәләре буенча, финалга бары тик беренче урынны алган җиңүчеләр генә үтә. Әмма Уканеевларның чыгышы тамашачылар һәм жюри күңелен шултиклем яулады ки, аларны да финал этабына чакырдылар.