Төшке аш әзерләргә дә, җырларга да осталар

«Аксу Агро» авыл хуҗалыгы предприятиесендә һәр бүлекчәдә ашханә бар. Бүлекчә территориясендә кыр эшләре алып барылганда, уракта катнашучыларга нәкъ менә алар хезмәт күрсәтә.

«Үзи» бүлекчәсендә пешекче булып Елена Полорусова, Алевтина Титова эшли. Алар механизаторлар, комбайнчылар һәм машина йөртүчеләр өчен беренче, икенче ашлардан төшке аш әзерлиләр. Кыр эшләренең кызу чорында шулай ук кичке аш та әзерлиләр, басуга алып килеп, кыр хезмәтчәннәрен сыйлыйлар. "Клиентлар" бик канәгать, пешекчеләргә хезмәтләре өчен рәхмәт әйтәләр.

Валентина Статина – исәпкә алучы, склад мөдире булып эшли. Аның да урып-җыю кампаниясе вакытында ашлык кабул итү һәм эшкәртү буенча мәшәкатьләре күп. Һәм ул барысын да уңышлы башкара.

– Ашханә һәм ашлык складында эшләүчеләр үзләренә йөкләнгән эшкә намус белән карыйлар, җиренә җиткереп, пөхтә итеп башкаралар, – дип фикерләре белән уртаклаша бүлек идарәчесе Владимир Айдов. – Өстәвенә, алар – ахирәтләр, дуслык аларга барлык кыенлыкларны җиңәргә ярдәм итә.

Сүз уңаеннан, Елена Полорусова һәм Валентина Статина Беловка авыл мәдәният йорты үзешчәннәре. Алар вокал төркеме әгъзалары, сәхнәдә чыгыш ясап, тамашачыларны үзләренең тавышлары белән сөендерәләр.