Террорчылыкка каршы яклауны көчәйтергә

Көн тәртибендәге төп мәсьәләләр – Яз һәм Хезмәт көнен, Бөек Ватан сугышында Җиңүнең 81 еллыгын бәйрәм иткәндә куркынычсызлыкны тәэмин итү, БДИ, җәйге балалар ялы урыннарын саклау, шулай ук 2024-2028 елларга террорчылыкка каршы тору планын үтәү. Утырышта катнашучылар шулай ук интернетта деструктив мәгълүматны блоклау ысулларына һәм яшьләр арасында профилактикага аерым игътибар бирделәр.

Катнашучылар террорчылыкка каршы тору өлкәсендә киеренке хәлне билгеләп үттеләр: янаулар саны арткан, гражданнарны, бигрәк тә балигъ булмаганнарны вербовкалау активлашкан. 2025 елда Татарстанда инфраструктурага һөҗүм өчен 14-18 яшьлек 15 яшүсмерне тоткарлаганнар, террорчылык һәм “колумбайн” белән кызыксынучы 12 кешене ачыклаганнар. Украина ягыннан БПЛА белән диверсияләр омтылышлары арткан. Чыгыш ясаучылар массакүләм чаралар алдыннан һәр хезмәт тарафыннан нинди профилактик чаралар һәм куркынычсызлык чаралары күрелүе турында хәбәр иттеләр.

Район эчке эшләр бүлеге җитәкчесе вазыйфаларын вакытлыча башкаручы Илназ Зәйдуллин 1 Май – Хезмәт бәйрәменә һәм Җиңүнең 81 еллыгына багышланган бәйрәм чараларына әзерлек һәм аларны уздыру чорында террорчылык актларын кисәтү һәм җәмәгать иминлеген көчәйтү буенча өстәмә чаралар турында җиткерде. Ул шулай ук 2026 елның I кварталында интернет мониторингы һәм деструктив төркемнәрдәге кешеләрне ачыклау турында сөйләде.

102 нче янгын сүндерү бүлеге җитәкчесе Руслан Ибляминов май чараларында өстәмә янгын куркынычсызлыгы чараларын билгеләде. Башкарма комитет җитәкчесе урынбасары Алексей Тимирясов массакүләм бәйрәмнәргә әзерлек турында бәян итте. Мәгариф бүлеге методисты Юрий Мишин БДИда куркынычсызлык чаралары, чыгарылыш кичәләре, 2026 елда балалар һәм яшүсмерләрнең җәйге ялын, мәшгульлеген оештыру, шулай ук балалар ялы урыннарының террорчылыктан саклануы турында сөйләде. Яшьләр эшләре һәм спорт бүлеге җитәкчесе Татьяна Убейкина ТР Спорт министрлыгының спорт тренерларын профилактика эшенә җәлеп итү буенча тәкъдимнәрен тормышка ашыруны яктыртты. “Форпост” үзәге директоры Динә Ибляминова социаль челтәрләрдә деструктив төркемнәргә язылучылар арасында профилактикага тукталды.

Катнашучылар халык күп җыелган объектларда катгый пропуск режимы, халык белән актив профилактика һәм аңлату эшләре кирәклеген ассызыкладылар. Комиссия бәйрәмнәрдә һәм Интернетта өстәмә куркынычсызлык чаралары турында Карар кабул итте, барлык халыкны уяулыкка һәм игътибарлылыкка өндәде.