Татарстан Дәүләт Советында республиканың Сәламәтлек саклау министрлыгы, Татарстан митрополиясе һәм Мөселманнар Диния нәзарәте арасында хезмәттәшлек турында генераль килешүгә кул куелды.
Документның максаты – сәламәтлек саклау өлкәсендә партнерлыкны ныгыту һәм рухи-әхлакый кыйммәтләрне яклау, дип хәбәр ителә парламент матбугат хезмәтендә.
Дәүләт Советы Рәисе Фәрит Мөхәммәтшин билгеләп үткәнчә, килешү 2008 һәм 2022 еллар практикасын дәвам итә һәм хакимият органнары белән дини оешмаларның уртак эше нәтиҗәсе булып тора.
Дәүләт Думасы депутаты Айрат Фәррахов искәрткәнчә, алдагы килешүләр табиблар һәм дини оешмалар катнашында, табигый сәбәпләрдән вафат булган өлкән яшьтәге кешеләрне яру тәртибен җайга салырга мөмкинлек биргән.
Татарстанның сәламәтлек саклау министры Альмир Абашев аңлатканча, яңа документ үлгән кешеләрнең туганнары белән табиблар арасындагы аңлашылмаучанлыкларны булдырмаска ярдәм итә. Килешү шулай ук хастаханәләрдә гыйбадәт бүлмәләре булдыру тәртибен ныгыта һәм барлык дин вәкилләренең пациентларга тигез керүен гарантияли. Моннан тыш, ул медицина учреждениеләрендә ирекле ярдәм оештыру буенча дини оешмаларның эшен чагылдыра.
Дин әһелләре ассызыклаганча, килешү кагыйдәләрне яхшырак аңларга ярдәм итә, диспансеризация узуны стимуллаштыра һәм пациентларга хастаханәләрдә гыйбадәт кылу мөмкинлеген тәэмин итә. Татарстан мөфтие Камил хәзрәт Сәмигуллин килешү кешеләрнең рухи ярдәменә уңай йогынты ясаячагына ышаныч белдерде, ә Казан һәм Татарстан митрополиты Кирилл авырулар өчен гыйбадәт кылу бүлмәләренең мөһимлеген билгеләп үтте.
Дәүләт Советының социаль сәясәт комитеты рәисе Алексей Созинов билгеләп үткәнчә, килешү, бигрәк тә махсус хәрби операция барган чорда, рухи ярдәмгә ихтыяҗ арткан вакытта, бик актуаль. Ул пациентлар белән эшләүнең медицина һәм рухи аспектларына бәйле сорауларны даими тикшерү өчен даими комиссия булдырыла, дип өстәде. Бу төбәк һәм федераль дәрәҗәдә закон чыгару эшчәнлегенә йогынты ясарга мөмкин.
Нет комментариев