Шахмат зонасы пәйда булды

Соңгы елларда мәктәп укучыларының спортның интеллектуаль төре – шахмат һәм шашка белән кызыксынуы аеруча сизелә – районда шахмат-шашка турнирлары төрле яшьтәге күпсанлы балаларны җыя. Шулай ук Рус Кармәте мәктәбе дә искәрмә түгел. Ел башында биредә хәтта Бөек Ватан сугышы герое – Филипп Мазилин истәлегенә турнир да узды, ул зур популярлык казанды. Әмма, рәсми спорт чараларында катнашудан тыш, балаларга шахмат һәм шашка уйнар өчен аерым шартлар юк иде. Ә хәзер шундый мөмкинлек пәйда булды – мәктәптә шахмат зонасы ачылды. Бу – түбән сыйныф укучылары һәм балалар бакчасында тәрбияләнүчеләр өчен (балалар бер бинада урнашкан) җирле совет депутаты Алексей Бурановтан бүләк.

Шахмат зонасы өстәлләр, шахмат һәм шашка җыелмалары, шахмат сәгатьләре белән җиһазландырылган уңайлы почмакны үз эченә ала. Биредә шулай ук өйрәнү өчен китаплар да, яшь уенчылар өчен плакат (стенд) та бар. Шахмат буенча дәресләр мәктәптән тыш вакытта үткәреләчәк.

Шахмат зонасы ачылуга ук инде берничә партия үткәрергә өлгергәннәр.

– Без районда шахмат спорты үсеше турындагы мәгълүматларны күзәтеп барабыз, – ди Алексей Буранов. – Ул югары дәрәҗәдә. Безнең балаларның да район үзәге шахматчыларыннан калышмауларын, катнашуларын һәм җиңүләргә ирешүләрен телисе килә.