Шәрбән авылы халкы җирлек эшләрендә актив

Муниципаль берәмлекнең эшчәнлеге турындагы хисап белән аның җитәкчесе Дамир Шәрифуллин чыгыш ясады.

Авылда 263 кеше яши, 105 хуҗалык бар. 2025 елда бер генә бала да тумаган, 8 кеше үлгән.

Җирлектә игенчелек һәм терлекчелек буенча Илдус Вафин, җиләк-җимеш үстерү буенча Вәсил Галләмов, кошчылык буенча Зөлфия Гатина хуҗалыклары уңышлы эшләп килә.

Дамир Шәрифуллин билгеләп үткәнчә, күп кенә гаиләләр шәхси ярдәмче хуҗалыкларны уңышлы алып баралар, мөгезле эре терлек (192 баш, шуларның 71е сыер), атлар, казлар, үрдәкләр, күркәләр тоталар һәм умарта үрчетәләр. Авыл халкы, гаилә бюджетын тулыландырып, ит һәм сөт сата.

Халык махсус хәрби операциядә катнашучы якташларына актив ярдәм күрсәтә: сугышчыларга акчалата ярдәм җыйганнар, җылы оекбашлар бәйләгәннәр, фронт өчен токмач кискәннәр. Район башлыгы авыл халкына ярдәмнәре өчен чын күңелдән рәхмәт белдерде. Хисап докладында ул шулай ук сәламәтлек саклау, мәгариф һәм мәдәният учреждениеләре эшенә тукталды, халыкның территорияне төзекләндерү буенча өмәләрдә актив булуын билгеләп үтте.

2025 елда үзара салым программасы буенча халыктан 114,5 мең сум акча җыйганнар, республикадан 458 мең сум финансланган – гомуми сумма нибары 572,5 мең сум булган. Бу акча авыл юлларын һәм суүткәргеч челтәрләрен ремонтлауга, урамнарны яктыртуны яңартуга, ике чапкыч һәм скважиналар өчен насослар сатып алуга тотылган. Үзара салым акчасы агымдагы елда су трассаларын, юлларны ремонтлауга, электр яктырту җайланмалары сатып алуга һәм башка ихтыяҗларга тотылачак.

Район башлыгы урынбасары Илшат Заһидуллин җирлек Советы эшенә яхшы бәя бирде.