Россия көне: Аксубай триколор төсләрендә – 30 метрлы байрак һәм беренче паспортлар

Аксубай бәйрәм төсләре, музыка һәм җылы атмосфера белән тулды. 

Кичәне балалар сәнгать мәктәбендә тәрбияләнүчеләр – «Алдынгылар хәрәкәте» яшьләр оешмасында катнашучылар флаглар белән патриотик флешмоб белән ачып җибәрделәр. Россия Федерациясе һәм Татарстан Республикасы гимннары астында Россия һәм Татарстан флагларын күтәрү тантанасы булды. Байракларны күтәрү хокукы махсус хәрби операциядә катнашучы Павел Ильинга һәм йөзү буенча республика ярышлары призеры Арина Зубаревага бирелде.

Татарстан Республикасы Рәисе һәм шәхсән үз исеменнән катнашучыларны дәүләт бәйрәме белән район башлыгы Алмаз Мингулов котлады.

– Россия көне бүген бөтен ил буйлап билгеләп үтелә һәм күпмилләтле халыкның бердәмлеге һәм бөеклеге символы булып тора. Без милләтенә, диненә карамастан, һәр халыкның кыйммәтләрен хөрмәт итүче республикада яшибез. Бездә патриотик тәрбия һәм яшьләргә ярдәм үсеш алган. Татарстанда кешеләрне берләштерүгә һәм илне ныгытуга юнәлдерелгән күпсанлы программалар гамәлгә ашырыла, – диде ул.

Район җитәкчесе үзе катнашкан 51 нче гуманитар конвой турында сөйләде, ул хәрбиләр өчен чираттагы ярдәм йөген алып барды. Якташлары исеменнән район халкына ярдәмнәре өчен рәхмәт белдерде. 

– Без хәзер алгы сызыкта булганнарга хезмәтне җиңеләйтергә тырышабыз, ә безнең уртак бурычыбыз – киләчәк буыннар өчен инде безнең белән булмаган геройлар турында истәлекне саклау, – дип өстәде ул.

Быел Аксубай районында бик күп проектлар гамәлгә ашырыла: яшьләр өчен парк төзелә, Яшьләр үзәге һәм Җиңү паркы ремонтлана, Боз сарае төзелә. Болар барысы да халыкның уңайлы тормышы һәм ялы өчен, район чәчәк атсын өчен эшләнә.

Күркәм гадәт буенча «Без – Россия гражданнары» акциясе кысаларында районыбыз яшьләренә беренче паспортлар тапшырылды.

Бәйрәмнең кульминациясе – Россия Федерациясенең утыз метрлы байрагын җәю булды. Балалар һәм өлкәннәр әләмне бөтен мәйданга җәеп җибәрделәр, периметр буйлап бергәләп зур тукыманы күтәрделәр һәм төшерделәр. Мәйданны каплап алган ак, зәңгәр һәм кызыл триколор дулкыннар булып уйнап, җанлы диңгез тәэсирен тудырды. 

Бәйрәм матур чыгышларга бай булды: балалар сәнгать мәктәбендә тәрбияләнүчеләр, район мәдәният йортының «Оляпка» рус халык җыры балалар ансамбле һәм башка яраткан башкаручылар үзләренең җырлары белән тамашачыларны сөендерде. Үзәк китапханә хезмәткәрләре «Минем илем — минем Россиям» интеллектуаль уенын оештырды, анда катнашучылар илнең тарихы, мәдәнияте һәм географиясе турындагы белемнәрен тикшерделәр.

Көннең яңгырлы булуына  карамастан, Аксубайда бәйрәм бик күңелле узды. Ул төрле буыннарны Ватанга мәхәббәт һәм үз иле өчен горурлык хисендә берләштерде.