Олимпия комитеты Камилә Вәлиева катнашында фигуралы шуучыларны бүләкләүдән баш тартты

Мактау пьедесталына Камилә Вәлиева күтәрелгән очракта, Пекинда узучы Олимпия уеннарында фигуралы шуу буенча команда ярышларында җиңүчеләрне бүләкләү тантанасы булмаячак. Халыкара Олимпия комитеты шундый белдерү белән чыгыш ясады.

Оешма җитәкчелеге фикеренчә, мондый карар барлык спортчылар һәм милли Олимпия комитетларына карата да гадел булачак.

«Барлык спортчылар һәм милли Олимпия комитетлары мәнфәгатеннән чыгып, бүләкләү тантанасын үткәрү максатка ярашсыз булыр иде. Чөнки анда, бер яктан, уңай А пробасына ия спортчы катнашачак, икенче яктан, аның допингка каршы кагыйдәләрне бозуы әле ачыкланмаган», - диелә Халыкара Олимпия комитеты белдерүендә.

Шул рәвешле, Пекинда узучы Уеннарда фигуралы шуу буенча команда турниры призерларын бүләкләү тантанасы булмаячак.

Шул ук вакытта, Халыкара Олимпия комитетында искәртүләренчә, Вәлиева эше төгәлләнгәннән соң оешма «бүләкләү тантанасын лаеклы төстә» үткәрәчәк.

Чыганак: tatar-inform.tatar