Мәктәпләр элеккеге режимга әйләнеп кайтачак, лагерьлар элеккечә эшләячәк

Роспотребнадзорның Аксубай районындагы идарәсе баш белгеч-эксперты Андрей Тимирясов хәбәр итүенчә, үзгәрешләр COVID-19 таралу шартларында мәгариф учреждениеләренең һәм балалар һәм яшьләр өчен башка социаль инфраструктура объектларын карап тоту һәм аларның эшен оештыру өлешендә кагыла.

Мәктәп укучылары мәктәпләрдә элеккеге режимга әйләнеп кайтачак: һәр сыйныфка аерым уку кабинетын беркетү һәм аттестацияләү урыннарында укучылар арасында 1,5 метрда ким булмаган социаль дистанцияне үтәү таләбе гамәләдән чыгарылган. Санитар кагыйдәләр нигезендә, хәзер әгәр бала COVID-19 белән авырган кеше белән элемтәдә булса, аның белем бирү оешмасына йөрүе өчен белешмә таләп ителми. Шул ук вакытта авыруны кичергәннән соң белешмә булу мәҗбүри булып кала.

Мәктәпләрдә укучыларның берберсе белән элемтәсен киметү өчен дәресләрнең төрле вакытта башлану һәм тәнәфесләрнең төрле вакытта игълан ителүен билгели торган кагыйдәләр дә бетерелгән. Массакүләм чараларны ачык һавада уздыру рөхсәт ителә. Җәйге сәламәтләндерү лагерьларының рөхсәт ителгән йөкләнешен проектлы сыйдырышлыгыннан 100 процентка кадәр арттыру рөхсәт ителә.

Шул ук вакытта шәһәр читендәге җәйге сәламәтләндерү учреждениеләре персоналы өчен кагыйдәләр катгый булып кала. Ул смена башланыр алдыннан антитәнчекләрне билгеләүче теләсә кайсы ысул белән COVID19га тикшерү узарга тиеш. Шул ук вакытта смена дәвамында атна саен тест узу гамәлдән чыгарылган.

Балалар өчен социаль оешмалар эшчәнлеге белән бәйле булмаган затларның, сулыш алу органнарын шәхси саклау чараларын кулланганда һәм соңгы 6 ай дәвамында вакцинация куйдыру яисә кичерелгән авыру турында мәгълүматлар яисә антитәнчекләр булган очракта оешмаларда булу мөмкинлеге дә бар.

– Элек гамәлдә булган күп кенә чикләү чараларының һәм коронавирус йогышын таратмау өлешендәге кагыйдәләр бетерелүгә карамастан, Роспотребнадзор балаларның һәм яшьләрнең сәламәтлеген саклау буенча вәзгыятьне аерым контрольдә тота, – дип шәрехләде Андрей Тимирясов.

Ул белем бирү оешмаларында эпидемиягә каршы чаралар комплексын үтәү мөһимлеге турында да искәртте: ачыш алдыннан генераль җыештыру, йогышсызландыру чараларын кулланып җыештыру, җилләтү, ашханә блогы персоналының битлек куллануы һәм башка санитар чараларны үтәү.