Иске Үзи авылының үз ял зонасы бар

Авыл “Авыл территорияләрен комплекслы үстерү” Россия Федерациясе дәүләт программасы кысаларында төзекләндерелгән. Парк территориясендә зур булмаган фонтан, эскәмияләр, урналар, яктырткычлар урнаштырганнар, сәхнәне монтажлаганнар, тротуар салганнар. Үзара салым программасы буенча балалар мәйданчыгы урнаштырганнар.

Төзекләндерү эшләрен шәхси эшмәкәр Равил Равзетдинов башкара. Җирлек башлыгы Надежда Айдова сүзләренә караганда, эшләр сыйфатлы һәм кыска вакытта башкарылган. Төзүчеләр – җаваплы кешеләр һәм алар мактау сүзләренә лаек.