Иске Мокшино белән Кече Сөнчәле авылларын заманча юл тоташтырды

«Чистай – Аксубай – Нурлат» автомобиль юлының Иске Мокшино – Кече Сөнчәле участогында 5,3 чакрым озынлыктагы юлны үзгәртеп кору эшләре төгәлләнде.

Эшләр «Татавтодор» АҖнең Аксубай филиалы көче белән «Спецдорпроект» ҖЧҖ проекты нигезендә башкарылды.

Трассаны яңарту район халкы өчен стратегик әһәмияткә ия. Бу маршрут торак пунктлар арасында төп транспорт элемтәсен тәэмин итә, район үзәгенә, медицина учреждениеләренә, мәгариф һәм социаль объектларга тоткарлыксыз барып җитү мөмкинлеге бирә.

Район халкы өчен бу юл – гади генә асфальт чакрымнары түгел, ә көндәлек тормышны уңайлырак һәм тынычрак иткән мөһим тормыш артериясе. Юл катламын норматив таләпләргә җиткерү һәм юлның күтәрү сәләтен арттыру инфраструктура чикләүләрен бетерергә мөмкинлек бирде. Юл хәрәкәте иминлегенең югары дәрәҗәсе бу участокта аварияләр санын киметә, бу исә йөртүчеләр һәм пассажирлар өчен юлны куркынычсызрак итә.

Фото район Башкарма комитеты архивыннан.