Иртәгә Аксубай районы Бөек Ватан сугышында катнашучы Елисей Мурзич Тимирясов белән хушлашачак

Аксубай районында яшәүчеләрнең буыны өчен Елисей Мурзич батырлык, ныклык, ватанпәрвәрлек үрнәге генә түгел, ә тормыш сөючәнлек, искиткеч тыйнаклык һәм намуслылык үрнәге дә булды.

Ул Бөек Ватан сугышы юлларын үтеп, әхлаки һәм физик чыныгу ала, өч фронтта сугыша, танкта яна, аңа бик күп сынауларны кичерергә туры килә.

Кызыл Армия сафларына ул 1942 елның 2 маенда ТатАССРның Аксубай РХК тарафыннан чакырыла. Бөек Ватан сугышы фронтларындагы сугышларда 1942 елның маеннан 1944 елның сентябренә кадәр катнаша. Сугыш барышында берничә тапкыр яралана. 9 нчы механизацияләнгән бригаданың 46 танк полкы составында хезмәт итә. Лейтенант Тимирясов танк командиры була. Корсунь-Шевченск операциясендә, Ясско-Кишинев операциясендә (1944 елның августы), Румынияне азат итүдә (1944 елның сентябре) катнаша.

1 нче дәрәҗә Ватан сугышы ордены (1985 ел), “1941-1945 еллардагы Бөек Ватан сугышында Германияне Җиңгән өчен” медале һәм юбилей медальләре белән бүләкләнгән.

Сугыштан соңгы елларда Елисей Мурзич Тимирясов мәгариф өлкәсендә хезмәт куя.

1945 елдан 1947 елга кадәр Аксубай урта мәктәбендә – хәрби җитәкче, 1947 елдан 1963 елга кадәр – тарих укытучысы, 1963 елдан 1984 елга кадәр Аксубай сигезьеллык мәктәбендә тарих укытучысы һәм уку-укыту мөдире.

Елисей Тимирясов – Аксубай районының легендар шәхесе! Елисей Мурзич җәмәгать эшчәнлегенә күп көч куя – егерме елдан артык район ветераннар советы рәисе булып эшли. Аның тормышы якты, мөһим эшләр белән тулы була. Ул үз районының, республикасының, Иленең битараф булмаган гражданы иде. Тарих белән генә түгел, ә туган як тарихын өйрәнү белән дә мавыга. Тууына 90 ел тулу уңаеннан ул туган якны өйрәнү турындагы мәкаләләр һәм очерклар җыентыгын – «В те далекие годы» дигән китап бастыра.

Аксубайлылар Елисей Мурзичның Җиңү парадындагы чыгышларын мәңгегә истә калдырачак. 
Ул быел да бәйрәм чараларында катнашырга ниятләгән иде.

Елисей Мурзич үзе туып-үскән, шуннан фронтка чакырылган, хезмәт эшчәнлегенең иң яхшы елларын багышлаган, укытучы буларак укучыларның берничә буынын тәрбияләгән Аксубай районының Мактаулы гражданины исемен горурлык белән йөртте.

Аксубай районында яшәүчеләр хәтерендә Сез мәңге яшәячәксез!

Хуш, сугыш солдаты! Хуш, Җиңү солдаты!

Елисей Мурзич Тимирясов белән хушлашу иртәгә, 18 апрельдә булачак.

10:00 сәгатьтә изге Феодосий Тотемский гыйбадәтханәсендә гражданнар панихиды узачак.

10:30 сәгатьтә Аксубай бистәсенең үзәк мәйданында матәм митингы узачак.