Яшел Үзәндә йортсыз хайваннарны аулауга 2026 елда 10 млн сум бүлеп бирәчәкләр

Подрядчы Яшел Үзән һәм район территориясендә йортсыз хайваннарны аулау, ташу, тоту һәм исәпкә алу белән шөгыльләнәчәк. Проектның төп максатлары – эпидемияләрне профилактикалау, халыкны яклау һәм милеккә зыян килүне булдырмау.

Контракт кысаларында хайваннарга ветеринария хезмәте күрсәтү каралган, котыру авыруына каршы вакцинация һәм дегельминтизацияне дә кертеп. Тотылган хайваннарны стерильләштерүгә һәм аларны яңа хуҗаларга тапшыруга аерым игътибар биреләчәк. Хайваннарны приютларда мәҗбүри 10 көнлек карантинда тотачаклар, аның барышында белгечләр тикшерү, вакцинация һәм барлык кирәкле процедуралар үткәрәчәкләр.

Һәр хайван турында мәгълүмат яңа хуҗалар эзләү өчен интернетта бастырылачак. Контракт шулай ук авыр дәвалап булмый торган авырулардан яисә тормыш белән ярашмый торган кискен җәрәхәтләрдән интегүче йортсыз хайваннарны эвтаназияләүне күздә тота.

Контрактның гамәлдә булу вакыты – 2026 ел дәвамы. Башлангыч бәясе 10 миллион сумнан артып китә. Исәпләүләр буенча, бер хайванга 3 мең сумнан артык чыгымны исәпкә алып, 2,6 меңнән артык йортсыз хайванны тоту планлаштырыла.