Яңа Ибрайда капиталь ремонттан соң юл ачылды. Һәр авыл өчен яңа юл – асфальтның бер чакрымы гына түгел, ә яхшы тормышка чын ыргылыш. Мәктәп бинасы янына халык истәлекле вакыйгада катнашу өчен җыелды.
1 километр 50 метр озынлыктагы яңа трасса торак пункт үзәген авылга керү юлы белән тоташтырган. Әле берничә ай элек кенә бу мәсьәлә хәл ителмәслек кебек тоела иде: яңгырлар вакытында Яңа Ибрайга кайту бик кыен иде. Җирле хезмәтләр авыл эчендәге юлларны яхшы хәлдә тотарга тырышсалар да, проблема килеп чыга иде.
«Татавтодор» АҖнең Аксубай филиалы хезмәткәрләре бик тырышып эшләгәннәр. Юл бик тигез салынган, төзүчеләрнең тагын бер казанышы – күперне ремонтлау. Хәзер ул ышанычлы һәм заманча күренә.
Бәйрәм халык көйләре астында башланды. Авыл халкы мәртәбәле кунакларны зур шатлык белән сәламләде. Халыкка район башлыгы Алмаз Мингулов мөрәҗәгать итте. Ул катнашучыларны Татарстан Республикасы көне белән котлады һәм юл төзүчеләргә тырыш хезмәтләре өчен рәхмәт белдерде.
– Бу юл халыкка яңа мөмкинлекләр бирә, – диде район җитәкчесе. – Бу мәктәпкә баручы балаларыбызның иминлеге, өлкән буынга уңайлыклар һәм җирле бизнесны үстерүгә этәргеч. Без киләчәктә дә һәр авыл республика кайгыртуын тоеп яшәсен өчен тырышачакбыз.
Яңа Ибрай авыл җирлеге башлыгы Фәхим Кәбиров тә авыл халкын һәм кунакларны сәламләде. Авыл хуҗалыгы җитештерүе ветераны, Татарстан Республикасының атказанган авыл хуҗалыгы хезмәткәре Вәлиҗан Җәлалетдиновтан да җылы сүзләр яңгырады, ул туган авылына чәчәк атуын теләде.
Тантананың кульминациясе булып бәйрәмдә катнашучыларның бердәм алкышлары астында узган бүләкләү тантанасы булды. ТР Муниципаль берәмлекләре арасында республика смотр-конкурсында җиңгән өчен Яңа Ибрай авыл җирлеге башлыгы Фәхим Кәбировка социаль-икътисади үсештә ирешкән уңышлары өчен Муниципаль берәмлекләр Ассоциациясе Дипломы тапшырылды.
Район башлыгының Рәхмәт хаты белән әлеге юлны белән төзүчеләр: «Татавтодор» АҖнең Аксубай филиалы директоры урынбасары Динар Низаев һәм асфальт-бетончы Владимир Кульков бүләкләнде. Яңа Ибрай мәктәбе директоры Ринат Мотыйгуллин һәм фермер хуҗалыгы башлыгы Ильяс Сөләйманов югары һөнәри казанышларын һәм намуслы хезмәтләрен җәмәгатьчелек тарафыннан таныту йөзеннән республика электрон Мактау тактасына урнаштыру турында таныклык алдылар.
Тантаналы митинг традицион рәвештә кызыл тасма кисү белән тәмамланды. Авыл кешеләренең шатлыклы авазлары астында яңа юлдан хәрәкәт рәсми рәвештә ачылды.
Нет комментариев