Элеккеге түрәне эшкә алу тәртибе

Бу кагыйдәләрне үтәмәү җитди хокуки һәм административ нәтиҗәләргә китерергә мөмкин. Район башлыгының коррупциягә каршы көрәш мәсьәләләре буенча ярдәмчесе Эльмира Крайнова бу процессны ничек дөрес оештырырга һәм элеккеге түрәләрне эшкә урнаштыруның законлылыгын һәм үтә күренмәлелеген тәэмин итү өчен төп хаталарга юл куймау кирәклеген аңлата.

– Элеккеге түрәләрне эшкә алу эш бирүченең аерым игътибарын таләп итә. Элеккеге хезмәткәрләрне эшкә урнаштыру үзенчәлекләрен күздә тоткан коррупциягә каршы көрәш турындагы законнарны һәм Россия Федерациясе Хезмәт кодексын исәпкә алу мөһим. Эш бирүчеләргә бу процесска дөрес якын килергә ярдәм итә торган төп моментларны карыйк.

Иң мөһиме – түрәнең элеккеге хезмәт урынына хәбәр итү бурычын игътибарсыз калдырмау. Эш бирүче элеккеге хезмәткәр белән хезмәт килешүе төзегәндә 10 көн эчендә мондый шартнамәнең төзелүе турында элеккеге хезмәткәрнең соңгы хезмәт урыны буенча яллаучы вәкиленә (эш бирүчегә) хәбәр итәргә тиеш (Федераль законның 12 маддәсе 4 өлеше). Күп кенә компанияләр (оешмалар) йә бу хакта оныталар, йә җитди куркынычлар китереп чыгара торган таләп турында белмиләр.

– Хәбәрнамә ничек бирелә, һәм анда нәрсәләр булырга тиеш?

– Эш бирүче элеккеге хезмәткәр белән хезмәт шартнамәсе төзелгән көннән алып 10 эш көненнән дә соңга калмыйча тиешле дәүләт органына яисә җирле администрациягә язма хәбәрнамә җибәрергә тиеш.

Белдерү – яңа эшкә урнашу турында тулы мәгълүматны үз эченә алырга тиешле рәсми документ. Анда фамилиядән алып вазыйфаи бурычларга кадәр барлык детальләрне, эшкә кабул итү турында боерык номерын да күрсәтергә кирәк.

– Бу тәртипне үтәмәгән очракта нинди җаваплылык каралган?

Мондый белдерү булмау яисә законнар нигезендә билгеләнгән срокны бозып тапшыру административ җаваплылык чараларын куллануга китерә.

Административ хокук бозулар турында Россия Федерациясе кодексының 19.29 маддәсе нигезендә вазифаи затларга (мәсәлән, оешма директорына) административ штраф салу каралган, штраф 20 меңнән 50 мең сумга кадәр, юридик затларга штраф күләме 500 мең сумга кадәр җитә. Моннан тыш, күрсәтелгән законны кабат бозу штрафлар күләмен арттыруга китерә.

– Түрәне эштән чыгарганнан соң бу чикләүләр күпме вакытка кагыла?

–Эш бирүченең хәбәр итү бурычы түрә дәүләт яисә муниципаль хезмәттән азат ителгәннән соң ике ел дәвамында гамәлдә була. Әлеге срок узгач, әлеге процедура инде кулланылмый.