Дәүләт алдындагы бурычларын үтәгәннәр

 «Канатлы пехота», «зәңгәр беретлар»   десантчыларны нинди генә сүзләр белән хөрмәтләмиләр,  әмма «Бездән башка беркем!» девизы алар өчен һәрчак үзгәрешсез кала. 

ҺДГ көне чын мәгънәсендә бөтенхалык бәйрәменә әверелде. Дистәләгән «канатлы гвардия» сугышчысы (ә алар арасында, билгеле булганча, элеккеләре булмый!) яңадан тельняшкаларын һәм  зәңгәр беретларын киделәр. 

Бәйрәм Мәңгелек ут һәм Хәрби Дан обелискы янында башланды, анда традиция буенча Һава-десант гаскәрләренең 89 еллыгына багышланган митинг узды. 

 –  Десантчылар  – ул һәрвакыт Кораллы Көчләрнең эталоны булды һәм һәрвакыт үрнәк булды. Район башлыгы, Башкарма комитет һәм шәхсән үз исемемнән сезне бәйрәм белән котлыйм, сәламәтлек, аяз күк йөзе, һәрвакыт хәрби рухта һәм уңай хис-кичерешләр белән яшәвегезне телим, –  дип мөрәҗәгать итте җыелучыларга Башкарма комитет җитәкчесенең социаль мәсьәләләр буенча урынбасары Сергей Александров. 

Шулай ук десантчыларны Үзәк хәрби округ инспекторы генерал-майор Анатолий Молоствов та котлады. 

 –  Без сезнең белән горурланабыз, сез дәүләт алдындагы бурычыгызны лаеклы үтәдегез. Ватан чакырса, сез яңадан  аның чикләрен сакларга әзер. 
Шулай ук тантана сәбәпчеләренә яшь буынны патриотик тәрбияләүгә зур игътибар бирергә, мәктәпләрдә ешрак булырга, укучыларда үз Ватаннарына, Россия Кораллы көчләренә карата горурлык хисе тәрбияләргә чакырды. Хәрби комиссариатка килгән егетләрнең десант гаскәрләрендә хезмәт итәргә теләүләрен, ә егетләрнең бу хәрби мәктәпне узгач чын ир-атларча чын яклаучы булуларын билгеләп үтте. 

Әлеге ир-атларның күпчелеге «кайнар нокталар»да булганнар, хәрби операцияләрдә катнашканнар. 

Россия Федерациясенең 381нче парашют-десант полкы ветераннар советы һәм оештыру комитеты исеменнән котлау телеграммасында Аксубай районының барлык десантчыларына һәм ветераннарына бәйрәм сәламе һәм һава десанты исеменә озак еллар тугры калуларын теләгән сүзләр язылган иде. Шулай ук элеккеге десантчы Александр Васильевич Горбуновны 85 яшьлек юбилее белән котлап, исемле медаль белән бүләкләделәр. 

Традиция буенча митинг ахырында сугышчан хәрәкәтләрдә катнашып һәлак булганнарны бер минутлык тынлык белән искә алдылар, геройлар  истәлегенә куелган һәйкәл итәгенә веноклар һәм чәчәкләр салдылар. 

Тантаналы чара моның белән генә тәмамланмады әле, фонтан янындагы үзәк мәйданда десантчыларны район Мәдәният йорты артистлары көтте, алар башкарган җырлар астында десантчылар сугышчан иптәшләрен искә алдылар,  әлеге очрашу алар күңелендә онытылмаслык тәэсирләр калдырды.