Авылда китапханәче булып эшләү җиңел түгел

Авыл китапханәчесе – психолог та ул. Әлбәттә, әгәр аңа ышаныч бар икән. Мәсәлән, Яңа Үзи китапханәсе мөдире Рифә Идиатуллинага кебек. Китаплар гыйбадәтханәсендә ярты гасыр эшләү дәверендә ул авыл халкы арасында абруй казанган. Китапханәгә укучылар китап алырга гына түгел, киңәш сорап та барганнар. Һәм бу, Рифә Сәмгетдин кызы фикеренчә, кыйммәтле нәрсә. Ә апрель башында инде Рифә Сәмгетдин кызы лаеклы ялга китте.

Ә бит кайчандыр туган авылы Яңа Үзигә Алабуга мәдәният һәм агарту училищесы дипломы белән кайтканда, ул китапханә диварларында илле ел шулай бик тиз узачагын күз алдына да китерә алмагандыр.

Ул нәкъ менә илле ел Яңа Үзи авыл китапханәсен җитәкли. Бу авылда ул гаилә бәхетен дә, яраткан эшен дә тапкан, шуңа күрә еллар узганын сизми дә калган.

Гәрчә эшнең үз кыенлыклары булса да – бинаны утын белән җылыткан вакытлар да булган, ире Фәрхат ярдәменнән башка аңа бу эшне башкарып чыгу авыр булыр иде. Ир белән хатын ике ул һәм ике кыз тәрбияләгәннәр, аларга белем алырга ярдәм иткәннәр.

Шул ук вакытта китапханәче, танылган язучы якташларыбыз истәлегенә юбилей кичәләре оештырулармы, авыл хуҗалыгы эшләреме яисә авылны төзекләндерү буенча өмәләрме, җәмәгать эшләреннән беркайчан да читтә калмый китапханә хезмәткәре.

Ә китапханәченең көндәлек эше, без уйлаганча, китаплар бирүдән генә тормый.

–Китапханәче һөнәре – иҗади һәм күпкырлы. Китапханәнең хәзерге хезмәткәре беренче чиратта мәгълүмат бирүче, – ди үзәк китапханә директоры Ирина Телешева. – Ләкин ул бит социолог та, педагог та, оештыручы да, хәтта актер да. Аның бурычларына китапханә фондын туплау һәм системалаштыру, абонементларны тутыру, формулярлар белән эшләү, төрле әдәбиятка кулланучылар гаризаларын кабул итү, мәгълүматны архивлау һәм шул ук вакытта укучыларга консультация бирү һәм китапларны косметик ремонтлау буенча гадәти эшләр дә керә. Укучыларга консультация бирү өчен билгеле бер эрудициягә, фәннең теге яки бу өлкәсендә яки башка өлкәдә белемгә ия булырга кирәк. Авыл китапханәчеләре исә туган якны өйрәнү һәм җирле традицияләр буенча материаллар җыялар һәм гомумиләштерәләр дә әле.

Әлбәттә, теләсә кайсы яхшы китапханәче эшчәнлегендә беренче урында – китапларга мәхәббәт. Әмма бу һөнәр кешесе эрудицияле генә түгел, аралашучан, ачык, актив булырга тиеш. Бу сыйфатлар Рифә Сәмгетдин кызына бик тә хас.

Ветеранны һөнәри бәйрәм алдыннан Үзәк китапханәдә тантаналы рәвештә лаеклы ялга озатулары очраклы түгел.

Үзәк китапханә җитәкчесе күпьеллык намуслы хезмәте өчен Рифә Идиатуллинага ведомствоның Мактау грамотасын тапшырды.