Асфальт булачак

Бу урамда яшәүчеләр, ниһаять, капиталь ремонтны көтеп алдылар.

Эшләр «Татарстан Республикасы торак пунктларының гамәлдәге асфальт-бетон өслекләрен ремонтлау» республика программасы буенча алып барыла. Подрядчы – «Татавтодор» оешмасы.

Район үзәгенең төп урамы – Золин урамы белән тоташкан якташыбыз, чуаш шагыйре Николай Полорусов-Шелеби исемен йөрткән тыныч урамда берничә көн машиналар гөрелтесе тынмый. Бер-бер артлы КамАЗ машиналары һәм башка техника килеп-китеп тора.

– Башта биредә иске юл өслеген кырып алдык һәм ташыдык, хәзер исә яңа юл нигезен төзүгә керештек. Юлның гомуми озынлыгы 350 метр тәшкил итәчәк, – дип сөйләде мастер Динар Низаев.

Юл төзелешен урамда һәм аңа тоташкан тыкрыкларда яшәүчеләр күзәтеп тора.

– Тавыш безгә комачауламый, түзәрбез, аның каравы яңа асфальт булачак, – дип уртаклашты пенсионер Петр Евграфов. – Район үзәгендә үзгәртеп коруларга сөенәбез, менә яңа юлны да көтеп алдык! Юлчылар тырышып, җитез һәм оператив эшлиләр.