Аның бакчасында гөлчәчәкләр һәм төнбоеклар чәчәк ата

Аның хуҗабикәсе – Рәмзия Паймулкина, аның өчен чәчәкләргә мәхәббәт мавыгу гына түгел, ә тормыш рәвеше булып тора.

– Чәчәкләрем бик күп төрле, – дип елмаеп сөйли Рәмзия Рәхимҗан кызы.

Чыннан да, аның коллекциясендә чәчәкләрнең нинди генә төре юк.

Монда, чыннан да, гүзәллек дөньясына аяк баскандай буласың. Түрдә – розалар патшалыгы. Фәкать розаларның гына 150 дән артык төре бар! Чәчәкләрдән күз камаша, бу матурлык белән ләззәтләнәсе дә, фотога төшерәсе дә, аларның хуш исеннән исерәсе дә килә.

Ул һәр чәчәкнең исемен белә, һәм бу мәгълүмат аның башында алфавит тәртибендә генә түгел, бәлки киресенчә дә саклана кебек тоела, җитмәсә әле бер генә тапкыр да түгел!

Аның бакчасында хәтта ябык сулыкларда һәм сазлыкларда үсә торган төнбоеклар да чәчәк атып утыра! Рәмзия бу нәзберек үсемлекне үстерү җаен да тапкан – алар өчен махсус сулы савытлар кулланган, ә алар тырыш хуҗабикәне назлы чәчәкләре белән сөендергәннәр. Чәчәкләр бакчаны гына түгел, ишек алдын, баскыч төбен, тәрәзәләрне, өй диварларын һәм беседканы да бизәп тора.

– Кайчакта миңа: «Чәчәк белән тамак туймый, бәрәңге утыртсаң яхшырак булыр иде”, – диләр, ди Рәмзия елмаеп. – Минем барысы өчен дә урыным җитәрлек: җимеш агачларына да, яшелчә түтәлләренә дә, чәчәкләргә дә.

Рәмзиянең чәчәкләргә мәхәббәте – ул гади мавыгуга караганда күбрәк, яшәү рәвеше. Ул чәчәкләр үстерү өлкәсендә мода тенденцияләрен күзәтә, махсус әдәбият укый, алар турындагы китапларны яздырып ала, үз тәҗрибәсе белән уртаклаша һәм яңа белемнәр бирә торган форумнарда «утыра».

Рәмзия Рәхимҗан кызы чәчәк үрентеләре дә, гөлләмәләр дә сатмый, аларны бакча белән хозурланырга килгән һәркемгә бүләк итә. Кунакларның күзләрендәге ихлас шатлык очкыннары – аның өчен иң зур бүләк.

Ире Сергей хатынының чәчәкләр белән мавыгуын хуплый, аңа кулдан килгәнчә ярдәм итәргә тырыша. Чәчәкләр сатып алу, аларны тәрбияләү өчен кайвакыт ир белән хатынның пенсиясе дә җитми.

Рәмзия һәм Сергей – гади кешеләр, без байлык җыймадык, диләр алар. Әмма аларның күңелләре күпкә кыйммәтлерәк нәрсәләр – бер-берсенә карата ярату хисләре, чәчәкләргә булган уртак мәхәббәт һәм бетмәс-төкәнмәс оптимизм белән тулган. Әйтергә кирәк, күпләр Рәмзия Рәхимҗан кызын актив волонтер буларак та белә – махсус хәрби операция башланганнан бирле ул, үзенең волонтерлык эше буенча күп кенә фикердәшләре кебек үк, Ватан сагында торган якташларга ярдәм итү буенча мәшәкатьләр һәм проблемалар белән яши, һәр көнне Яшьләр үзәгендә була. Әмма мавыгулар өчен һәрвакыт вакыт табыла.

– Кемдер диңгезгә ял итәргә бара, кемдер машиналар һәм фатирлар сатып ала, ә менә миңа барыннан да бигрәк чәчәкләр ошый, ди Рәмзия. – Мин алар янында ял итәм, алар белән сөйләшәм.

Бервакыт Рәмзиягә, көзге җыештыруга мохтаҗ бакчасын калдырып, берничә көнгә китәргә туры килә.

Өенә ул, бакча ташландык хәлдәдер инде, дип, борчылып кайта. Ләкин аны күңелле сюрприз көткән була – каенатасы белән каенанасы бакчаны корыган чәчәкләрдән тулысынча чистарткан булалар. Ул авызын ачып: нинди матурлык иде – чәчәкләр җәй буе безне сөендерде, дип әйтергә дә өлгерми. Каенанасы елмаеп: синең матурлыгыңны дүрт трактор арбасы төяп түктек, дип җавап бирә.

Быелгы чәчәкләр сезоны тәмамланып кына килә әле, ә Рәмзия Рәхимҗан кызы киләсе елга яңа планнары белән яши инде. Без киләсе елда аның чәчәкле җәннәте тагын да матуррак, яктырак һәм төрлерәк булачагына ышанабыз.

Чәчәкләр үстерергә һәвәс Рәмзия Паймулкина да шулай ук район газетасы редакциясеннән «Иң чәчәкле бакча» бәйгесендә катнаша.