Аксубайның «Язгы вернисаж»ы Казан күргәзмәсендә тәкъдим ителде

Экспозициядә төрле жанрдагы иҗади эшләр тәкъдим ителде: картиналар – пейзажлар, натюрмортлар, борынгы татар элмә техникасы белән бизәлгән декоратив-гамәли сәнгать эшләнмәләре: чигелгән паннолар, калфаклар, өйне бизәү әйберләре.

Язгы вернисажны ачу тантанасына бик күп кунаклар җыелды, алар арасында рәссамнар, музыкантлар, җәмәгать эшлеклеләре дә бар иде.

– Мондый күргәзмәләрдә һәркем үзе өчен ачыш ясый һәм элеккеге татар мәдәнияте ирешкән үрләр турында белә, – дип билгеләп үтте, күргәзмәне ачып, Татарстан Халыклар дуслыгы йорты директоры Ирек Шәрипов. – Энтузиастлар тырышлыгы белән кулдан чигү сәнгате онытылмаган, ә аңа музей җыелышларында гына кагылырга мөмкин булыр иде. Мондый сәнгатьнең республиканың Халыклар дуслыгы йортында куелуына чын күңелдән шатмын.

Тантана сәбәпчесе республика башкаласында күргәзмәне оештыруда ярдәм итүчеләрнең барысына да рәхмәт белдерде. Җыелучылар аның элмәк техникасы белән мавыгу тарихы, аксубайлыларның туган якны өйрәнү музеенда оештырылган осталык дәресләрендә зур кызыксыну белән шөгыльләнүләре турында сөйләгәнен кызыксынып тыңладылар. Автор ассызыклаганча, татар мәдәниятенең әлеге юнәлеше онытылырга тиеш түгел. Шулай ук ул үз картиналары белән таныштырды, Аксубай районы мәчетләренә багышланган эшләр циклы турында сөйләде.

– Күргәзмә ачылу миңа рухлану, илһам, шатлык хисе бирде, – дип уртаклашты Әлфия Рәшит кызы. – Яңа идеяләр барлыкка килде, мин аларны киләчәктә тормышка ашырачакмын.

Фото: Нурхәммәтовларның гаилә архивыннан һәм ТР Халыклар дуслыгы йорты сайтыннан.