Аксубайның «Вега» приютында хайваннарны котыру авыруыннан бушлай вакцинацияләү башланачак

Аксубай районында сукбай хайваннар өчен «Вега» приютында дүрт аяклы дусларны котыру авыруыннан бушлай вакциналаштыралар. Бу хакта «Татар-информ» мәгълүматлар агентлыгына приют җитәкчесе Марина Симакова хәбәр итте.

Шул көннәрдә приютка профильле хезмәтләр вәкилләре белән бергә Аксубай районы башлыгы Камил Гилманов та килде. Ул җәмәгатьчелектән җыелган хәйрия акчасына төзелгән вольерларны, рекреацион зонаны карады, хезмәткәрләр белән приют проблемалары турында фикер алышты.

“Камил Камал улы безнең приютка югары бәя бирде, хайваннар белән эшләүдә системалы якын килүне аерым билгеләп үтте. Ә бит алар безгә хәлсез, авыру, социальләштерелмәгән хәлдә эләгәләр, ә монда тулы тернәкләнү узалар. Район башлыгы приютка тулы ярдәм итәргә вәгъдә бирде, беренче чиратта безгә җирне рәсмиләштерүдә ярдәм кирәк. Бу юнәлештә эш тулы куәтенә бара, безгә башкарма комитетның юридик бүлеге булышлык күрсәтә. Эш шунда ки, без киңәергә һәм приютны аурупа стандартлары буенча үзгәртеп корырга телибез. Ике карантин зонасы, медицина блогы, хайваннарның барлык яшь категорияләрен исәпкә алып — көчекләр һәм зур этләрнең үз аерым мәйданчыклары булсын өчен, саф һавада йөрү зонасы булдырачакбыз. Участокка документларны алганнан соң, проектлаштыруга керешәчәкбез. Ә аннары грант алуга гариза тапшырачакбыз», — дип сөйләде Марина Симакова.

Приют хуҗабикәсе шулай ук, район башлыгы белән яңа килгән хайваннарны котыру авыруыннан бушлай вакциналаштыруга килешүгә ирешүләре турында да хәбәр итте. «Моңа кадәр без вакцинацияне җыелган хәйрия акчасы хисабына үткәрдек», — дип билгеләп үтте әңгәмәдәш.

Муниципаль берәмлек җитәкчесе зоояклаучы белән киләчәктә уртак хезмәттәшлекнең үз карашы белән уртаклашты. «Камил Камал улы безнең ”төп бәла” — ул йорт хайваннарының тәртипсез үрчүе, дип саный. Беркемгә дә кирәксез хайваннарның дөньяга килүен кисәтү өчен, мәчеләрне дә, этләрне дә халык өчен бушлай стерилләштерергә кирәк. Район моның өчен акча табачак. Без бу башлангыч өчен ике куллап тавыш бирәбез, чөнки ташлап калдырылган хайваннар бик күп. Бүген приютта 250 эт һәм мәче яши. Һәрберсен стерилләштерергә, өч тапкыр вакцина ясарга һәм аннан соң гомерлеккә карап торырга кирәклеген исәпкә алып, алар турында кайгырту гаять авыр. Әгәр Аксубайда йорт хайваннарын бушлай стерилләштерү программасын эшләтеп җибәрү мөмкин булса, без аны гамәлгә ашыруда кулдан килгәнчә ярдәм итәчәкбез», — дип белдерде волонтер.