Аксубайның «Барс» командасы хоккей буенча турнирда ветеран һәвәскәрләр командалары арасында призер булды

Чистай шәһәренең боз аренасында өч район – Азнакай, Чистай һәм Аксубай районнары вәкилләре арасында чын-чынлап көрәш барды. Һәр команда 30 апрельдә Арчада узачак ярышлар финалында катнашу хокукы өчен көрәште.

Финал уеннары бик киеренке булды. Җиңүче буллитлар буенча билгеләнде. Чистай командасы белән матчта исәп көндәш файдасына 6:5 иде. «Барс» командасы Азнакай командасына да бер алкага оттырды.

«Чистое поле» командасы (Чистай шәһәре), турнир алтынын яулап, үзенә финалга чыгу хокукын тәэмин итте. Азнакайлылар көмеш призерлар булдылар. «Барс» хоккей командасы турнирның бронза медаленә лаек булды. Уенчылар истәлекле медальләр белән бүләкләнделәр.

«Барс» ветераннар командасы (40тан өлкәнрәк яшьтә) бу турнирда инде 13нче тапкыр катнаша. 2018 елда ул республика ярышлары чемпионы булды.