Аксубайда Виталий Тимирясов истәлегенә ачык турнир узды 

Казанның Виталий Тимирясов исемендәге инновацион университетының беренче ректоры призына шашка-шахмат турниры Аксубайда сигезенче тапкыр уздырылды. Ярышларның масштабы елдан-ел киңәя бара. Башта ул район турниры буларак кына үтә иде. Билгеле булганча, Виталий Тимирясов Аксубай районыннан, Барское Енорускино авылында туган. Соңрак ярышлар районара һәм республика дәрәҗәсендә үтте. 

Шахмат һәм шашка буенча турнир 1нче мәктәп базасында узды. Учреждение аның исемен йөртә. Интеллектуаль спорт укучыларда да, өлкән буын вәкилләрендә дә кызыксыну уята. Быел ярышларда республиканың алты районыннан 120дән артык кеше катнашты. Шунысы кызык, иң яшь катнашучыга 7 яш булса, иң өлкәненә 83 яшь. 

Аксубай районының шахмат клубы җитәкчесе Геннадий Горбунов һәр елны баш хөкемдар булып тора. Судьялар коллегиясе составына педагогика ветераны Геннадий Горбатов та керде. Шахмат баталияләре бер үк вакытта берничә мәйданчыкта катнашучылар арасында җитди игътибар астында үтте. 

Ачык турнирның оештыручысы һәм иганәчесе югары уку йортына нигез салучының кызы Асия Тимирясова җитәкчелегендәге Казан инновацион университеты. 

Виталий Гайнулловичның кызы белән бергә турнирны үткәрү инициаторы булган район башлыгы Камил Гилманов турнирны оештыручыларга рәхмәт белдерде һәм турнир ел саен күбрәк катнашучыларны җыя, дип билгеләп үтте. 

– Ярышларның географиясе үсүенә мин бик шат. Мин биредә тумасам да, бу районга карата минем аерым, җылы мөнәсәбәтем. Чакыруга җавап биргән, турнирда катнашкан һәркемгә рәхмәт. Үз көчләрен кызганмыйча, балаларга интеллектуаль спортка мәхәббәт сеңдергән һәм аларны шашка-шахмат дөньясы белән мавыктырган тренерларга, укытучыларга аерым рәхмәт, – дип билгеләп үтте ул. 

Шәхси зачетта җиңүчеләрне җыйган очколар буенча билгеләделәр. Беренче-өченче урыннарны алган катнашучылар грамоталар, медальләр һәм Асия Тимирясовадан акчалата бүләкләр алдылар. 

Гомуми зачетта Аксубай районы командасы бәхәссез лидер булды. Мактау пьедесталының икенче баскычына Чистай районы вәкилләре күтәрелде. Нурлатлылар рейтингта өченче урынны яулады.