Аксубай яшьләре репродуктив сайлау проблемасы турында фикер алышуга кушылды

Чарада район үзәгенең белем бирү учреждениеләре укучылары, администрация һәм медицина җәмәгатьчелеге вәкилләре катнашты, алар арасында башкарма комитет җитәкчесенең социаль мәсьәләләр буенча урынбасары Сергей Александров, протоиерей, изге Феодосий Тотемский гыйбадәтханәсе башлыгы Александр Качаев, табиб акушер-гинеколог Сергей Цыганов, медик-социаль ярдәм кабинетының социаль эш буенча белгече Ольга Пименова, йөкле хатыннар һәм балалы гаиләләр өчен приют администраторы Гүзәл Апраскина бар иде. Тамашачылар игътибарына абортлар темасына кагылышлы «Сайлау хокукы» дигән нәфис фильм тәкъдим ителде.

Татарстан Сәламәтлек саклау министрлыгы ярдәме белән республикада «Умиление» гаилә, аналар һәм балаларны яклау үзәге оештырган беренче кинокартина май ахырында Казанда күрсәтелде. Нәкъ менә шул вакытта республиканың барлык районнарында тасманы прокатка алу кирәклеге турында карар кабул ителде.

Югары сыйныф укучылары һәм универсаль технологияләр техникумы шәкертләре очраклы гына тамашачылар булмадылар. Чөнки нәкъ менә тиздән алар алдында репродуктив сайлау мәсьәләсе килеп туарга мөмкин. Нәкъ менә тормышны саклап калу ягына дөрес карар кабул итүдә реаль вакыйгаларга нигезләнгән әлеге картина ярдәм итә ала.

Фильмны караганнан соң фикер алышу булды. Йөкле хатыннар һәм балалы гаиләләр өчен приют администраторы Гүзәл Апраскина абортларны кисәтү буенча «Плюс бер» проекты турында тәфсилләп сөйләде, «Умиление» гаилә, аналар һәм балаларны яклау үзәге эшчәнлеге белән таныштырды. Җәмәгать ярдәмчесе фильмның эмоциональ яктан көчле булуын ассызыклады, аны нәкъ менә яшьләргә, өлкән сыйныф укучыларына күрсәтергә кирәклеген билгеләп үтте.

Фильмны караганнан соң протоиерей Александр Качаев яшь буынга фатихалы сүзләре белән мөрәҗәгать итте. Табиб акушер-гинеколог Сергей Цыганов «һәр кешенең тормышка хокукы бар, хәтта тумаган баланың да», дип басым ясады. Ул уйланылмаган карарларның нәтиҗәләре турында сөйләде, яшьләрне «нинди дә булса адым ясаганчы, җитди уйланырга» чакырды. Чыгыш ясаучылар «Плюс бер» проектын алга этәрүгә үз тарафларыннан ярдәм итәргә әзер булуларын белдерделәр.

– Без гаилә кыйммәтләре җимерелгән вакытта яшибез. Традицияләр югала, ә бу фаҗигагә китерә. Дәүләт гаиләләр таркалмасын, балалар тусын өчен кулдан килгәннең барысын да эшли. Әмма яңа технологияләр килү белән хәл яхшырмый. Бу фильм җитди, чыннан да катлаулы тема өстендә уйланырга мөмкинлек бирә. Уйланыр өчен сәбәп бирә. Сез, өйгә кайткач, үз сәламәтлегегез һәм балаларыгызның киләчәге өчен җаваплылык турында тагын бер кат уйласагыз иде, – дип мөрәҗәгать итте яшьләргә башкарма комитет җитәкчесенең социаль мәсьәләләр буенча урынбасары Сергей Александров.

Белешмә өчен:

Татарстанда ТР Министрлар Кабинеты ярдәме белән абортларны комплекслы кисәтү буенча «Плюс бер» федераль проектын тормышка ашыру буенча эш оештырылды, аның кысаларында социаль юнәлештәге нәфис фильм да күрсәтелә. Республика территориясендә «Плюс бер» проектын гамәлгә ашыруның координаторы булып «Умиление» АНО гаилә, ана һәм балаларны яклау үзәге тора. Ул «Волонтер-медиклар» Бөтенроссия иҗтимагый хәрәкәте, Россия Сәламәтлек саклау министрлыгы һәм Президент грантлары фонды ярдәмендә, иң эре профильле коммерцияле булмаган оешмалар белән берлектә, кризислы йөкле хатыннарга комплекслы ярдәм күрсәтү проектын тормышка ашыра. Бүген «Плюс бер» проекты Россиянең 10 пилот төбәгендә: Магадан, Түбән Новгород, Пенза, Самара, Свердловск, Смоленск һәм Төмән өлкәләрендә, Татарстан Республикасында, Алтай һәм Ставрополь крайларында эшли.