Аксубай районының 9 нчы сыйныф укучыларына аттестатлар тапшырыла

Бүген тантаналы рәвештә 2 нче Аксубай мәктәбендә төп гомуми белем турында аттестатлар тапшырылды. Бу мәктәптә 27 укучы тугызынчы сыйныфны тәмамлаган, аларның өчесе аерым үрнәктәге аттестат алган.

Чыгарылыш сыйныф укучыларын, ата-аналарны мәктәп директоры Энҗе Туктарова җылы сәламләде.

– Бу сезнең тормышта мөһим документларның берсе. Бүген сезнең төп гомуми белем турындагы документны тулы составта алуыгыз безнең өчен бик күңелле. Барыгызның да шәхес булып җитешүегезне, уңышларга, танылуга ирешүегезне телим. Барлык педагогик коллектив исеменнән ышанычлы әйтә алам, киңәш, ярдәм сорап мөрәҗәгать итсәгез, теләсә кайсы очракта да без сезгә булышырга тырышачакбыз. Белеп торыгыз, безнең ишекләр сезнең өчен һәрвакыт ачык, – дип билгеләп үтте ул.

Чыгарылыш сыйныф укучыларын укыту-тәрбия эшләре буенча директор урынбасары Флюра Фәхретдинова, тугызынчы сыйныф җитәкчесе Флера Вафина да котладылар. Алар бүген тугызынчы сыйныфны тәмамлаган барлык укучыларның да аттестат алуына шат булуларын билгеләп үттеләр, мәктәпне тәмамлаучылар арасында фәннәр буенча төп дәүләт имтиханын тапшыра алмаучылар юк.

Бу мәктәпне тәмамлаучылар, башка белем бирү оешмалары укучылары кебек үк, хәзер яңа ачышлар юлында. Укуларын 10-11 сыйныфларда дәвам итәргә теләүчеләр өчен мәктәп ишекләре 1 сентябрьдә ачылачак, ә кемнәрдер, мәктәп елларын артта калдырып, техникум һәм көллиятләр ишекләрен ачып керәчәк.