Аксубай районында балалар Раштуа йолаларын онытмый

Якты Раштуа бәйрәме уңаеннан балалар авыл мәдәният учагына җыелды, биредә алар киенеп-бизәнеп, җырлар белән авыл буйлап киттеләр.

Авыл китапханәчесе Татьяна Коннова сүзләренә караганда, бу авылда Раштуа бәйрәменә багышланган бәйрәм чарасы оештыру үзенә күрә бер матур гадәт. Өстәвенә, өйләр буйлап иртә белән – балалар, ә кичен яшьләр йөри. Һәр йортта хуҗалар, Раштуа бәйрәме белән котлап, балаларга тәңкәләр өләшә. Алар өйгә килсә – анда ел әйләнәсе иминлек булачак дип санала.
– Халык безне сөенеп каршы ала, – ди Татьяна Кононова.

Безнең хәбәрчебез дә авыл балаларының гасырлар буена сакланып килгән гореф-гадәтләрне онытмавын, ә халыкның аларны ничек көтеп алуын үз күзләре белән күрде.
Беренче йортта ук хуҗабикә Лидия Кондрашова каршы алды. Ә йоланы саклаучылар аның аяк астына ашлыкны юмарт итеп сиптеләр, хуҗабикә исә ел әйләнәсе муллык булсынга юрап, табын тутырып ризык әзерләгән.

Хуҗабикә балаларга бик рәхәтләнеп тәм-томнар өләште, татлы ризыклар беән сыйлады.