Иң яхшы эшләр күргәзмәсе 2 августта район мәдәният йортында тәкъдим ителәчәк.
Районда “Аксубай киңлекләре” республика рәссамнар пленэры тәмамланды. Ике атна дәвамында пумала осталары үз полотналарында район тарихын яздылар. Алар белән очрашулар вакытында һәркем безнең район, биредә яшәүче кешеләр турында җылы сүзләр әйтте, безнең як табигатенә сокланды. Рәссамнар алар өчен пленэр булуы һәм алар безнең районда коллектив иҗат эшеннән ни көтүләре турында сөйләделәр.
Ирина Хөсәенова, рәссам, Лениногорск шәһәре:
– Сезнең халык дустанә, ачык йөзле. Мине бигрәк тә сезнең район халкының иртә таңнан үз участокларында хезмәт куюлары таң калдырды. Чәчәкләр бик күп, алар район үзәген бизәп тора. Кечкенә орлыктан матур чәчәк үстерү өчен күпме хезмәт куелган. Иҗади кеше буларак, минем өчен кешеләрнең үз эшләренә мәхәббәт һәм җан бирүләрен күрүдән дә күркәм нәрсә юк. Сезнең төбәк легендаларга бай, без аларны иҗат аша күрсәтергә тырыштык. Шунысы игътибарга лаек, районда мәдәни мирас объектлары булган биналар сакланган. Архитектура корылмаларын торгызу буенча белгечләр төркеме белән эшләсәк, аларга икенче сулыш өрергә мөмкин. Минемчә, бу үсеп килүче буын өчен танып-белү булачак.
Марат Әфләтунов, Түбән Кама шәһәре:
– Профессионаллар үзара даими аралашалар. Бу пленэр кебек зур очрашуларның өстенлеге шунда ки, картинаны язган вакытта синең янга башка оста килергә һәм күргәннәргә үз төзәтмәләрен кертергә мөмкин. Шулай итеп, картина саран һәм җансыз түгел, ә төрле образлар белән тулачак. Бер баш әйбәт, ә икесе – тагын да яхшырак, диләр бит. Бу минем икенче пленэрым, һәм мин янә зур илебезнең төрле шәһәрләреннән иҗат кешеләре белән бер урынга җыелуыма шат. Чөнки җанлы аралашуны берни дә алыштыра алмый. Мондый очрашуларда без иҗат хәзинәбезне баета, потенциалны арттыра алабыз. Минем эшләр графика стилендә гади, гель белән башкарылган. Шуңа күрә, әйтик, картиналарны май белән язучы осталарның эшен күзәтү минем өчен бик кызыклы. Без тәҗрибә уртаклашабыз, бер-беребездән файдалы яңалыкларга өйрәнәбез.
Вәгыйз Камалетдинов, Чуаш Республикасының атказанган рәссамы:
– Без табигатьтән өйрәнәбез. Ул рәссамнар өчен бик көчле. Пленэр – ул үзенчәлекле, без, рәссамнар өчен мәктәп. Өстәвенә, иҗатта үсәргә беркайчан да соң түгел. Камиллекнең чиге юк. Картиналарымны елдан-ел яхшырак ясыйсым килә. Әлбәттә, пленэр – хезмәттәшләр белән аралашу. Бу – туганлык, кешеләр бердәмлеге. Һәр очрашу безнең өчен бик кадерле. “Аксубай киңлекләре” пленэры рәссам өчен табигатьнең күп нәрсә икәнлеген раслады. Мин илһамландым. Мин үземә генә хас үзенчәлек белән матурлыкка үз карашымны күрсәтергә, йөрәккә аеруча кадерле булган нәрсәләрне сурәтләргә тырышам.
Владимир Новиков, Россия һәм Татарстан Рәссамнар берлеге әгъзасы, Яшел Үзән шәһәре:
– Мин кырык елдан артык сәнгать мәктәбендә укытучы булып эшләдем. Хәзерге вакытта эштән китү турында гариза бирдем. Хәзер минем үземне тулысынча иҗатка, сәнгатькә багышлыйсым килә. Мин бу хакта гомерем буе хыялландым. Ничектер шәхси күргәзмә ачылганда бер кыз миннән пленэр минем өчен нәрсә ул, дип сораган иде. Мин: “Мин бит рәссам. Мин кешеләргә матурлыкны күрсәтү өчен, үзләренең начар мөнәсәбәтләре белән әйләнә-тирә дөньяга нинди зыян китерергә мөмкин икәнлеге турында уйлансыннар өчен язам”, дип җавап бирдем. Дөресен генә әйткәндә, мин табигатьне пычратуны бик авыр кичерәм. Юлда чүп-чар күрсәм, йөрәк әрнеп куя. Шуңа күрә картиналарда әйләнә-тирә матурлыкны күрсәтергә тырышам. Кешеләр, минем картиналарымны күреп, бераз булса да үз-үзләрен тоту турында уйланырлар дип өметләнәм.
Камил Гилманов, Аксубай районы башлыгы:
– Пленэрга килгән рәссамнар командасы – республиканың алтын фонды. Аңа киләчәктә дә уңышлар телим. Аларның картиналары мөһим миссия алып килсен – Татарстанның матурлыгын аның барлык төрлелегендә киләчәк буыннарга күрсәтсеннәр.
Мөдәрис Минһаҗев, ТР Рәссамнар берлеге рәисе урынбасары:
– Аксубайда безне чираттагы тапкыр кабул иттеләр. Бу бик күңелле. Камил Гилмановка, искиткеч мәгариф учреждениесе директоры Фәрхат Аюповка һәм район халкына кунакчыллыклары өчен зур рәхмәт. Татарстан Рәссамнар берлеге сезнең районда үткәрелә торган мәдәни проектларда беренче тапкыр гына катнашмый. Былтыр җәйдә узган пленэр барлык катнашучыларда онытылмас тәэсирләр калдырды. Без район халкының сәнгать иҗатына битараф булмавын, матур, иҗади хезмәтне бәяли белүләрен күрдек. Ике атна эчендә пленэр эшендә без сезнең төбәкнең бөтен гүзәллеген җиткерергә, бу районда яшәүче кешеләрнең матурлыгын күрсәтергә тырыштык. Алга таба да тыгыз хезмәттәшлеккә ышанам. Район җитәкчелеге һәм халкын мәдәни мирас объекты – иске Дәүләт банкы бинасын торгызу проекты кызыксындыра дип уйлыйм. Аксубай районы елъязмасына үз өлешебезне кертергә теләгән уйларыбыз күп.
Республика пленэры вакытында рәссамнар иҗат иткән барлык эшләр Аксубай районына бүләк ителәчәк. Иң яхшы картиналар күргәзмәсе 2 августта район мәдәният йортында тәкъдим ителәчәк. Экспозицияне барлык теләүчеләр дә карый алачак. Күргәзмә эше 15.00 сәгатьтә башлана.
Нет комментариев