Аксубай районы башлыгы Камил Гилманов: «Безгә ныклы хакимият, тотрыклылык кирәк»

Сайлау участогына ул тормыш иптәше Асия Зөфәр кызы белән килде.

Участокка кергәндә аның температурасын тикшерделәр, шәхси саклану чаралары белән пакет бирделәр һәм участокка кул металлодетекторы сканерлаганнан соң гына узарга рөхсәт иттеләр.

Сайлау участогында һәркем бу процедурага дучар ителә, дип ышандырдылар. Монда санитар таләпләр генә түгел, җәмәгать иминлеге таләпләре дә төгәл үтәлә.

Кулына сайлау бюллетеньнәрен алып, Камил Гилманов тавыш бирү кабинасына узды. Ә аларны тавыш бирү урнасына төшереп, үзенең гражданлык бурычын үтәвен шәрехләде.

– Без якын биш елда республика белән Президент җитәкчелек итсен өчен тавыш бирәбез, аның тырышлыгы белән безнең төбәк, Татарстан иң яхшы, матур һәм чәчәк атучы төбәк булды. Бүген мин хакимиятнең җирле органнарына һәм Россия Федерациясе Дәүләт Думасына депутатлар өчен тавыш бирдем. Депутатлыкка кандидатлар безнең өметләрне аклар дип ышанам. Үзебезнең бистәнең, районның тотрыклы үсешен, бездә булган проектларның үтәлүен күрәсе килә, моның өчен ныклы хакимият, тотрыклылык кирәк, – дип билгеләп үтте район башлыгы.