Үзәк китапханәдә китаплар белән беррәттән «Татмедиа» АҖ чыгара торган даими басмалар, журналлар да популяр.
Алар арасында мәдәният, сәнгать турында сөйләүче «Татарстан» иҗтимагый-сәяси журналы, «Казан», «Сәхнә», «Идел» әдәби-яшьләр журналы һәм башка бик күп басмалар бар. Китапханә фондын 15 атамадагы газета тулыландыра. Һәм алар укучыларга бик кирәк. Бу хакта Аксубай үзәк китапханәсенең әйдәп баручы китапханәчесе Фаимә Гатина сөйләде.
– Нинди журнал популяррак дип аерым әйтеп булмый, – дип белдерде ул. – Үз юнәлешләрендә барысы да бай мәгълүмат бирә. Безгә төрле яшьтәге, һөнәр ияләре, социаль категория кешеләре килә. Һәркемнең үз ихтыяҗлары, мәнфәгатьләре бар. Төп контингент – 35 яшь һәм өлкәнрәк хатын-кызлар, алар йорт, гаилә өчен файдалы басмаларны, рецептлар, киңәшләрне кызыксынып укыйлар, шулай ук яшьләр өчен дә басмалар бар. Бик матур эчтәлекле балалар журналлары өлкән буын кешеләрен җәлеп итә – әбиләр оныкларына укырга алалар.
Китапханәнең актив китап укучыларыннан берсе Ольга Зартдинова белән китапханә залларының берсендә сөйләштек.
– Сөембикә журналын зур кызыксыну белән ачам, – диде ул. – Чөнки ул һәр хатын-кызга якын. Биредә уңышлы кешеләр, авыл хезмәтчәннәре, шуның белән бергә бик күп файдалы киңәшләр, аш-су рецептлары белән танышырга мөмкин. Һәр саны яңалыкларга бай.
Нет комментариев