Аксубайның «Чиста урманнар» акциясен Урмандеево төбәгеннән башлаячаклар

Менә инде 12 ел дәвамында республикада урманнарда экологик, санитар-экологик хәлне яхшыртуга ярдәм итә торган программа эшли. Әлеге акция ярдәмендә республикада, шул исәптән безнең район урманнарында да, күп кенә территорияләр, ял итү урыннары һәм башка объектлар чистартылган һәм төзекләндерелгән.

«Татарстанның чиста урманнары» акциясендә табигатьне яратучы волонтерларның, әйләнә-тирә мохит язмышына битараф булмаган кешеләрнең катнашуы каралган. Табигатьне саклау акциясенең көзге этабын Аксубай урманчылыгы һәм урман хуҗалыгы 24 сентябрь, шимбә көнне Урмандеево авыл җирлегендә урнашкан Чабаксар участок урманчылыгы урманнары территориясендә башлаячак. Акциядә Урман хезмәткәрләре белән бергә җирлекнең ведомство оешмалары хезмәткәрләре дә катнашачак. Шулай ук туган якны чистарак һәм матуррак итәргә теләүчеләр дә чакырыла.