Аксубайда ишегалды бәйрәме: күңел ачу һәм дусларча очрашу урыны

Вакыйгалар үзәгендә төзекләндерелгән балалар мәйданчыгы булды, анда балалар шаярдылар, уйнадылар.

Чараны район Башкарма комитеты җитәкчесенең икътисад буенча урынбасары Илшат Моратшин ачты.

— Шундый искиткеч республика программалары кысаларында без балалар уйный торган урында басып торабыз, Аксубайда «Безнең ишегалды» программасы буенча бик күп эшләнә, — дип билгеләп үтте ул. — Бәйрәмнең күңелле узсын, барыгызга да яхшы кәеф телим.

Мәдәният бүлеге җитәкчесе Наталия Куштукова теләкләргә кушылды һәм күршеләр, бигрәк тә яшь буын арасында дуслык һәм үзара ярдәмләшүнең мөһимлеген ассызыклады.

Бәйрәм вакытында шушы йортларда яшәүчеләргә «Безнең ишегалды» программасын тормышка ашыруда актив катнашканнары өчен Рәхмәт хатлары тапшырылды.

Бәйрәмдә төрле форматтагы мәйданчыклар оештырылды, алар балаларның да, өлкәннәрнең дә игътибарын җәлеп итте. Аквагрим тирәсенә балалар төркеме җыелды. Шахмат сөючеләр өчен аерым өстәл тәкъдим ителде. Шулай ук балыкчы почмагы һәм рус баш киеме ясау буенча остаханә эшләде. Актив уеннар команда рухын үстерүгә ярдәм итте, ә сый тулы өстәл бәйрәмгә кунакчыллык өстәде.

Район талантлары — Варвара Панюкова, Борис Ильин, Кирилл Крайнов, Фәнис Низамов, Илсөя Мифтахова һәм китапханәче Татьяна Артамонованың концерт номерлары ямь өстенә ямь булды.

Аксубай китапханә системасы директоры Ирина Телешева 50 ел бергә яшәгән ирле-хатынлы Нурзилә һәм Хәким Гыйззәтуллиннарга, күптән түгел балалары дөньяга аваз салган Васильевлар гаиләсенә, шулай ук күп балалы гаиләләр Горбуновларга, Мошковларга, Пивоваровларга, Сейдалиевларга бүләкләр тапшырды.

Татар ашлары рецептлары белән китап 20 нче йортта яшәүче Гөлсем апага тапшырылды, ул барысын да тәмле ризыклары белән сөендерде.

Эчке эшләр бүлеге ветераны Рәмзия Бакирова бәйрәм алдыннан гына күршеләргә атап язган шигырен укыды.

— Мин бу йортта 20 ел яшәдем, һәм минем барлык бәхетле вакытларым шушында үтте, – диде Рәмзия апа. – Без күршеләр белән бер гаилә кебек дус яшәдек.

Бәйрәм алдыннан катнашучыларга лотереядә катнашу өчен номерлар таратылган иде – соңыннан барысы да истәлекле бүләкләр алды. «Такмаклар батлы» аеруча күңелле булды, анда балалар да, өлкәннәр дә такмакларны белүдә дәртләнеп ярыштылар, ишегалды шат авазлар белән тулды. Бәйрәмгә кунак булып килгән зур панда нәниләр белән бергә биеде, балаларда һәм аларның әти-әниләрендә соклану һәм елмаю уятты.

ВСЕ ФОТО СМОТРИТЕ ПО ССЫЛКЕ