Аксубайда яшь гаиләләргә торак сертификатлары тапшырылды

Бәхетле гаиләләр арасында – Гүзәл һәм Илшат Хафизовлар, Тамара һәм Фәрит Вәлиуллиннарның күп балалы гаиләләре.

Торак сертификатларын район башлыгы Камил Гилманов тапшырды.

– Бүген дәүләт балалары булган гаиләләргә ярдәм чаралары күрсәтә. Торак сертификатлары торак сатып алу чыгымнарын өлешчә каплаячак. Программадан файдаланып, сезнең гаиләләрегез тагын да ишәер дип өметләнәбез. Күп балалы гаиләләр артында – безнең районның киләчәге, – дип билгеләп үтте район башлыгы.

Хафизовлар гаиләсе бүгенге көндә арендага алынган фатирда яши. Гүзәл – «Кояшкай» балалар бакчасында тәрбияче, Илшат – Россия ЭЭМның Аксубай районы буенча бүлеге хезмәткәре. Ирле-хатынлы кызлары – мәктәп укучысы Әминәне һәм ике ул – алты яшьлек Кәрим һәм Шакирны тәрбияли.

– Безнең гаиләбез оешуга тугыз ел һәм бу еллар дәвамында без арендага алынган фатирда яшибез. Сертификатка районда йорт сатып алырга планлаштырабыз. Яшь гаиләләргә ярдәм итү программасы өчен район һәм республика җитәкчелегенә рәхмәт белдерәсебез килә, – ди Илшат Хафизов. – Башка гаиләләргә әйтәсе килә – кызыксыныгыз, программаларда катнашыгыз, чиратка басыгыз. Без 2020нче елда гариза бирдек һәм сертификат алдык. Дәүләт ярдәме – торак шартларын яхшырту өчен яхшы ярдәм.

Тамара белән Фәрит Вәлиуллин йорт һәм торак сертификаты сатып алганнар инде, сертификатны ипотека ябу өчен кулланырга планлаштыралар. Аларның өч уллары яңа торакка чын күңелдән шатлана. Уртанчы уллары – Данис, яңа йортта һәркемнең үз бүлмәсе барлыгы турында сөйләде.

– Безнең йорт – ике катлы, уйнарга, йөгерергә, күңел ачарга урын бар. Урын күп һәм хәзер мин дусларымны чакыра алам, – дип бала шатлыгы белән бүлеште.

Район башкарма комитетының инфраструктура үсеше бүлеге баш белгече Наталья Садовникова сөйләгәнчә, «Татарстан Республикасында яшь гаиләләрне торак белән тәэмин итү» программасы буенча бүгенге көндә дүрт гаилә чиратта тора.

Сертификат күләме торакның базар бәясенә турыдан-туры пропорциональ. Нормативлар буенча гаиләнең бер әгъзасына 18 квадрат метр туры килсә, программа кысаларында торакның норматив мәйданыннан 35 процентына субсидия бирелә. Быел сертификат күләме биш кешедән торган гаилә өчен миллионнга якын сум тәшкил итте.

Программада катнашу өчен гаиләләр гариза бирергә мөмкин. Төп шартлар – ир белән хатынның берсенең булса да яше 35 яшьтән артмаска тиеш.