Аксубайда янгын сүндерү бүлеге хезмәткәрен лаеклы ялга озаттылар

Чара янгын сүндерү часте бинасы каршында узды һәм анда аның хезмәттәшләре, янгын-коткару часте җитәкчеләре һәм тармак ветераннары катнашты.

Минәсхәт Бәһаветдинов 1996 елның 21 ноябрендә Аксубай янгын сүндерү-коткару часте хезмәткәре булып хезмәт итә башлый. Өч елдан соң ул бүлек командиры вазыйфасына күчерелә, ә 2000 елда каравыл җитәкчесе итеп билгеләнә. Минәсхәт Минәхмәт улы бер еллык тәнәфес ала, ләкин 2002 елның июлендә каравыл җитәкчесе вазифасына кире кайта. Аның янгын сүндерү частенда хезмәт итү стажы 27 ел һәм 10 ай. Үз эшчәнлеге чорында ул күп тапкырлар район җитәкчелегеннән һәм Россия гадәттән тыш хәлләр министрлыгының Татарстан Республикасы буенча Баш идарәсеннән рәхмәт хатлары һәм Мактау грамоталары белән билгеләп үтелгән.

Бүлек җитәкчесе урынбасары Зөлфәт Җиһангиров, үз чыгышында Минәсхәт Минәхмәт улының югары дисциплинага һәм хезмәткә намуслы мөнәсәбәтенә басым ясады.

– Минәсхәт Минәхмәт улы һәрвакыт үз вазифаларын намуслы һәм җаваплы башкарды, үз һөнәренең чын остасы булды, — дип ассызыклады ул. – Сезне лаеклы ялга китүегез белән котлыйм һәм сәламәтлек телим. Безнең ишекләр һәрвакыт сезнең өчен ачык булачак.

Элеккеге хезмәттәшләре дә изге теләкләр һәм бүләкләр белән килделәр, аңа яшь буын янгын сүндерүчеләре ярдәм иткәне һәм остазлыгы өчен рәхмәт белдерделәр.

Озак еллар намуслы хезмәте һәм югары профессионализмы өчен Минәсхәт Минәхмәт улына Рәхмәт хаты тапшырылды.

—Бердәм хезмәтебез һәм кирәк булганда ярдәм кулы сузганыгыз өчен барыгызга да зур рәхмәт, – дип мөрәҗәгать итте тантана гаеплесе үзен лаеклы ялга озату тантанасына җыелучыларга. – Барыгызга да исәнлек-саулык телим.

Бәйрәм традицион тантана белән тәмамланды — хәвеф сигналы яңгырады һәм Минәсхәт Баһаветдиновны лаеклы ялга янгын сүндерү машинасы җиңсәләреннән су сиптереп озаттылар – хезмәттәшләре 27 ел хезмәт итү дәверендә тупланган бөтен корымны һәм пычракны «юып төшерделәр».