Аксубайда «Герой атасы» күргәзмәсе ачылды

Тантана район мәдәният йортында узды.

— Бу күргәзмә бөтен республика буенча уза, һәм аның максаты — беркемнең дә онытылмавын искәртү, — дип мөрәҗәгать итте әти-әниләргә һәм район кешеләренә район башлыгы урынбасары Илшат Заһидуллин. — Үз гомерләре бәрабәренә Ватаныбызны саклаучыларны тәрбияләгәннәре өчен әти-әниләргә зур рәхмәт. Алар турындагы истәлекләр безнең йөрәкләрдә мәңге яшәячәк.

Чара барышында ул СВО катнашучыларының якыннарына медальләр тапшырды: Светлана Ксенофонтовага — улы Андрей Ксенофонтов өчен “Батырлык өчен” медален, Венера Хәммәдиевага — “СВО катнашучысы” медален һәм “Сугышчан туганлыкны ныгыту өчен” медален, Ләйсән Хөснетдиновага — ире Айрат Хөснетдинов өчен “Батырлык” орденын.

Православие чиркәве башлыгы протоиерей Александр Качаев геройларның гаиләләренә ярдәм итүнең мөһимлеген ассызыклады.

–Безнең һәркайсыбыз үз көчебездән килгәнчә ярдәм итәргә тиеш, – дип билгеләп үтте ул. – Геройларның якыннарына һәм туганнарына бу авырлыкларны күтәрергә сабырлыклар телим.

«Ватанны саклаучылар» фонды координаторы Татьяна Крайнова күргәзмәне булдыру фикере турында сөйләде.

— Күпләр: “Бу ни өчен кирәк? “ – дип сорадылар. Җавап гади – истә тоту өчен. Хәзер без үзебез өчен генә түгел, алар өчен дә яшибез һәм алар истәлегенә лаеклы яшәргә бурычлыбыз.

Үзәк хәрби округы инспекторы Анатолий Молоствов улларын югалткан әти-әниләргә тирән ихтирам хисләрен белдерде.

–Мин сезнең алда баш иям һәм чын геройлар тәрбияләгәнегез өчен рәхмәт белдерәм, – диде ул.

Күргәзмә безнең районда 21 сентябрьгә кадәр эшләячәк.