Аксубайда беренче сыйныф укучылары – портфельләр, активистлар – бүләкләр, тамашачылар концерттан онытылмаслык тәэсирләр алдылар

Кичә беренче сыйныф укучыларын һәм аларның әти-әниләрен сәламләү сүзләреннән башланып китте, алар быел беренче тапкыр парта артына утырачак. Район җитәкчелеге аларга иң изге теләкләрен җиткерде. Беренче сыйныфка баручыларга сәламләү сүзе белән мәгариф бүлеге җитәкчесе Рәмзия Зәйдуллина мөрәҗәгать итте.

– Район предприятиеләренә, оешмаларына, депутатларга, авыл җирлекләренә һәм “Мәктәпкә җыенырга ярдәм ит” хәйрия акциясендә катнашучыларның барысына да чын күңелдән рәхмәт белдерәсем килә, – диде ул. – Балалар, белем дөньясына рәхим итегез!

Кичәдә катнашучыларның бердәм алкышлары астында тантана гаеплеләре сәхнәгә менделәр, акция кысаларында һәр беренче сыйныф укучысына мәктәп букчалары тапшырылды.

Тантана район үзәгенең иң актив кешеләрен бүләкләү белән дәвам итте. Энтузиазм һәм “Безнең ишегалды” дәүләт программасын тормышка ашыруга керткән өлешләре өчен Елена Данилова, Светлана Сидорова, Галина Цветкова, Зинаида Тарасова, Галина Быстрова һәм Людмила Жирнова Республика җитәкчесеннән Рәхмәт хатлары алдылар.

Кичке концерт программасы якты һәм бай булды. Тамашачыларны район мәдәният йорты, балалар сәнгать мәктәбе, Татар Сөнчәлесе авыл мәдәният йортыннан “Ялкын” вокал ансамбле, “Родник” вокал коллективы, шулай ук Беловка авыл мәдәният йортыннан “Шур çăл” ансамбле һәм Кече Сөнчәле авыл клубыннан Вера Уканеева һәм Валентина Калукова дуэты чыгышлары сөендерде.