Мәзгудә Зарипова 1930 елда крестьян гаиләсендә туган.
Мәзгудә Галимҗан кызының язмышы, шул буын кешеләренеке кебек үк, авыр сынаулар белән үткән, аеруча Бөек Ватан сугышы елларында.
Аның балачагы бик иртә тәмамланган. 1941 елда әтисе авыр чирдән вафат булган, һәм дүрт бала тәрбияләү йөге әнисе җилкәсенә төшкән. Мәзгудә кечкенәдән үк сеңелләрен карауны һәм өй хуҗалыгын алып баруны үз өстенә алган.
Алдагы еллар да даими хезмәттә булган: печән чабу, урманда утын әзерләү һәм ташу, уңыш җыю, тракторчыларга һәм комбайнчыларга ярдәм итү. Сугыштан соң кыз үзенең яшьтәшләре белән урман кисү эшләрендә катнаша. Сугыштан соңгы ярлылык шартларында өскә һәм аякка кияр кием булмаган, шуңа күрә чабаталарны үз куллары белән үргәннәр.
– Мин колхозда төрле участокларда эшләдем, тормыш җиңел булмады, ләкин мин беркайчан да төшенкелеккә бирелмәдем, – дип искә алып сөйләде бәйрәм сәбәпчесе.
Мәзгудә күрше авыл егете Фәйзерахманга кияүгә чыккан. Ләкин гаилә бәхете озакка бармаган: ире улы туганчы ук вафат булган. Яшь хатын бала белән ялгызы калган һәм бар көчен улын үстерүгә биргән.
Мәзгудә Галимҗан кызы улы һәм килене гаиләсе белән яши. Аның оныклары, оныкчыклары бар.
Юбилей уңаеннан Мәзгудә Зарипованы район Башкарма комитеты җитәкчесе урынбасары Алексей Тимирясов һәм Шәрбән авыл җирлеге башлыгы Дамир Шәрифуллин котладылар. Алар аңа ныклы сәламәтлек, иминлек һәм озын гомер теләделәр, бүләкләр, чәчәкләр һәм РФ Президенты Владимир Путинның котлау хатын тапшырдылар.
Нет комментариев