Аксубай ветераннарын Игелек һәм хөрмәт көне белән котладылар

Тамашачылар залында төрле елларда үзгәртеп корылган район оешмалары һәм предприятиеләре ветераннары һәм җирле артистларның чыгышларын яратучылар урын алды.

Залда игелекле, күңелле мохит хөкем сөрде. Бу көнне район мәдәният йортына килү – дуслар һәм танышлар, күптән күрешмәгән кешеләр белән аралашу мөмкинлеге дә.

Тантананың рәсми өлешен район башкарма комитеты җитәкчесе вазыйфаларын башкаручы Алмаз Мингулов ачты.

– Бу көнне сезгә, хөрмәтле ветераннар, рәхмәт сүзләре әйтергә мөмкинлек бар. Сез район, республика һәм ил үсешенә зур өлеш керттегез, традицияләрне, әхлакый кыйммәтләрне саклаучылар булып торасыз. Сезгә зур рәхмәт сүзләре җиткереп шуны әйтәсем килә: сездән бу кыйммәтләрне безнең яшьләребез кабул итә. Алар буыннардан-буыннарга тапшырылачак.

Район җитәкчесе күп милләтле районыбызда күркәм традицияләр күп булуын, дус-тату яшәвебезне билгеләп үтте. Ул кырыс еллардагы авырлыкларны җиңеп чыккан, Ватаныбызның бәйсезлеген саклап калган һәм үз хезмәте белән аны торгызган сугыш чоры кешеләренә аерым рәхмәт белдерде. Өлкән буын кешеләре адресына изге теләкләрен җиткерде.

Тармак ветераннарына ТР спорт министры урынбасары Илдар Садриев мөрәҗәгать итте.

– Татарстан Республикасы хөкүмәте, спорт министрлыгы исеменнән, ихлас күңелдән сезне Игелек һәм хөрмәт көне белән котлыйм! – диде ул. – Өлкән буынга безне үстергәннәре, тәрбияләгәннәре, республика үсешенә керткән өлешләре өчен рәхмәт белдерәбез. Сез безнең яшь буын өчен үрнәк булып торасыз. Нык сәламәтлек, озын гомер сезгә!

Тантанада катнашучылар җыр жанры сәхнәсе осталарына һәм яшь, талантлы башкаручыларга җылы алкышларын кызганмадылар. Шулай ук район мәдәният йортының хореография ансамбле тамашачыларның сокланулы карашлары астында бию ритмында чыгыш ясады. Якты номерлар көчле алкышлар белән үрелеп барды.

Бу көнне район җитәкчелегеннән 940тан артык пенсионер бүләк алды.